Asaph mɛɛ ŋga wra kɔ.
81
Nyiɛkpɔɔ wi o faŋga,kena e yɛshɔɔrɔ kpɔɔ tɛɛ
e u ŋga mɛɛ,
e Jacob Nyiɛkpɔɔ wre ŋga mɛɛ.
2 E mɛɛ na binyi
na juru na saŋgo tɛɛ,
e mɛɛ kɔ e u ŋga.
3 Na nyiɛpɔ yili fɔŋgɔ mbe o bnɔ fɔ,
na nyiɛpɔ kre da ndra lalaa
mbe o ble kpɔɔ li.
4 Israel leele kee ŋga pie na pini yi,
a kre mbra ŋga yiri
Jacob Nyiɛkpɔɔ wre pan.
5 Ŋga ble wra wi
na Egypt leele ni kre,
kre wra u leele pre ŋga kre mbra ŋga.
Ki ble kre
o na mana ka sembremu loo mbo,
6 “Ndaa e shɔ mu yili
tuuro nyjɛ e naa tru yire nu,
mna e shɔ tnumu badɛnyi
nyjɛ e naa pini nu.
7 Ŋga e naa wa kanyana nu kre,
e na ni yeeri,
a ndaa loo mna e shɔ.
Ndaa shɔ e pan nyiɛtwanraa nu,
a ndaa e pe mu le
Meribah blo kre mbɛɛ na.
8 Ni leele, e loo ni pan,
ni e jaari, Israel leele,
kie tna ni pan na
ee ndie tɛɛ ni pan.
9 Yaashia yaka na ki nyini sumi
mbe ya ni na,
ndee mbe sumi yira
chaa tɛɛ eyɛ pan.
10 Mi wi e Tafun Nyiɛkpɔɔ wre,
mi ndaa e wɔ Egypt tra nu kre,
e nyu nyaa, mbe ti mbe e yɔɔ.
11 La, ni leele pre wa ndie tɛɛ ni pan,
ni leele Israel leele pre,
wa peyɛ nyjii mbe ni ŋga.
12 Ki tia pe ndikana ndra na
ni pe wa,
mbe pe nyaari pre titi kooloe
nyjɛ pe chaa na.
13 Na ni leele pre wra ni kee loo,
ni leele Israel leele pre,
na pie na taa ni kee na kre,
14 kaa kia na mu,
mbe ndaa pe loŋgoolo tre tra,
mbra pe kla poŋgo.
15 Mblɛ pe ni pra kre we fiɛrɛ tɛɛ
mbe kosie kan ni yiɛ.
A pe ndie tiniɛ we kpɔɔ
nyjila kro nu.
16 La, ni leele pre rɛ,
mbe ti pe sro ŋga
ki tna pe pan li mbe yɔɔ,
mbe srɛ li mbe yɔɔ.”