Asaph mɛɛ ŋga wra kɔ.
80
Israel leele lefun,ndie tɛɛ o pan mu Israel le
na mbaala lefun u mbaala le.
Ŋu mu jiin yurɛ mblɛ pe yeeri
Cherubim pre lalaa,
ti mbe o mu yɛnyiŋge nya.
2 Nyiɛkpɔɔ, mu jaŋga nyina,
mu pan mu o shɔ.
Wre lɛ mu leele Ephraim na
Benjamin na Manasseh sele wolo.
3 Nyiɛkpɔɔ, ti o ndruu pan,
mu jaara, mbe mu yiɛ nyaa,
mbe o le, mbe o ŋmaa ta.
4 O Tafun Nyiɛkpɔɔ Jaŋgafun,
nyjila ŋgi nu mu krɔ we kun,
na mu leele nyiɛtalaa ni
mbe sɛ su hin?
5 Mu tia fooro lie kaari o sro,
a yotunyi kaari o nyumu.
6 Mu tia waŋgrɛ nyjɛ
yi o fɛ mu kun yire
na wii peyɛ na,
na ŋmina o tra na,
a o loŋgoolo na o tɛɛ.
7 O Tafun Nyiɛkpɔɔ Jaŋgafun,
ti o ndru mbe pan mu jaara.
Yiɛ nyaa mu o nyina
mbe o ŋmaa ta.
8 Ŋu mna yiri na o ni Egypt na
mu pan na o ni, mu o luu
na afoo tiŋge yi pe tra nu.
9 A mu tra kre fali
mu afoo tiŋge kre luu,
a ki didinyi kan mu tra kre shɔ
mu ta.
10 A ki fo mu nduu
mu nyuɛ yire kro tɔ,
a ki nyimi wo
cedar tinyi badɛnyi yire na.
11 Hali ki klɛ yire yɛ sɛ da epo na,
a yi yɛ sɛ da lɔɔ kpɔɔ kre na.
12 Mni a mu bubunyi nyjɛ yi fɛ
mu o kun juari,
a mblɛ pe tro na afoo kre
sɛnyi juu hin?
13 Nyawɔɔlɔ tinyi yire bie
taanla na klai,
a puɛ yurɛ na yi kaa.
14 O Tafun Nyiɛkpɔɔ Jaŋgafun,
yire nyjeeri wa
mu ndra soo mu o le,
mu pan mu mu leele shɔ.
15 Pan mu afoo tiŋge
ŋga ŋu titi luu kre shɔ,
ŋu mu tia kre afoo ŋga na lee
na faŋga ni.
16 Mu afoo tiŋge kre,
pe ki kun mu wa, mu ki sro,
kena krɔ tɛɛ mu pe kla.
17 Kɛ tɔ mu leele
mblɛ mu wɔ pre na.
Pre lɛ leele mblɛ mu wɔ
mu pe ŋga faŋga kre.
18 Waa laa mu kro fio,
kena o ŋga ŋmaa
mbe o mu mɛɛ yeeri.
19 O Tafun Nyiɛkpɔɔ Jaŋgafun,
ti o ndruu pan mu jaara,
yiɛ nyaa mu o le, mbe o ŋmaa ta.