Asaph mɛɛ ŋga wra kɔ.
79
O Tafun Nyiɛkpɔɔ,leele mblɛ pe n mu chin kre,
pe pan mu wi mu mu
tra kre shɔ mu ta.
Pe mu Suminyuŋgo kre tɔ
na nɛɛrɛ ni, mu Jerusalem kla.
2 Pe tia mu sumifɛɛnlɛ pre,
pe gboolo kaari hanyiɛlɛ,
na puɛ yurɛ sro.
3 Pe pe nyimi kna mu wo
na nyumu yi,
mu Jerusalem fɛ mu kun,
a ndro n wa mbe pe gboolo le.
4 O tnifɛɛnlɛ o pini na tɛɛ,
ki tia leele mblɛ pe fɛ
mu o kun krɛrɛ
na o tɛɛ na o pini lɛmbɛ kee.
5 O Tafun, mu krɔ we kun
na o ni blenyini ree?
Ndee mu ti
mbe mu krɔkuɔn kre kro,
mbra nyini na kanhun yi ra?
6 Mu krɔkuɔn kre wɔ mu waŋgrɛ
nyjɛ yi n mu chin yire nyina.
Ki wɔ mu ŋulo mblɛ
pe n na mu sumi pre nyina.
7 Ŋgi na hin?
Pe mu leele Israel wolo pre gbo,
mu pe tnihɛɛ kro kla.
8 Maa shia o tolɛɛlɛ pre sisam sɔɔnri,
mbe yi tɛɛ mbe o fɔlɔ tɔ.
Ti mbe mu foorochiɛn kpɔɔ kre pan.
Ŋgi na hin? O dankna kro kɔ.
9 O ŋmaashɔfun Nyiɛkpɔɔ ya o na,
mu tɔ o sisam na.
10 Mni a leele mblɛ pe n mu chin
pre na yuu na,
“Sena pe Nyiɛkpɔɔ wre nyi hin?”
Pre leele pre ndie tini o yiɛ na,
mbe pe chin na mu leele
mblɛ pe gbo pre,
na ŋu mu pe pe ma.
11 Mblɛ pe yii mu le nyuŋgo
pre nyɛnɛɛ loo,
a jaŋga ŋga kii wa mu nu kre
saara na, mblɛ pe gbun
kumu pimi ni pre shɔ.
12 O Tafun, leele mblɛ pe n mu chin
kre, pe fɔlɔ tɔ gbee kɔɔnashin,
tɛɛlɛɛ nyjɛ pe mu tɛɛlɛ
yire ndra na.
13 Na ki pan ma,
wre mblɛ o pe mu leele,
a o pe mu mbaala pre,
oo mu ŋga mboo nyjila kro nu,
mbe mu ŋga mɛɛ blenyini.