Asaph mɛɛ ŋga wra kɔ.
78
Ni leele, e ni kee nyjɛni e nyina yire loo,
e ni nyu kee loo.
2 Mbe paara yomɛɛlɛ nu,
mbe fakee nɔɔ nyina.
3 Kee nyjɛ o chin na kee nyjɛ o loo,
na nyjɛ o tolɛɛlɛ yo o pan kre,
4 yire kee yire,
waa yi ndra o biile na,
o Tafun wre faŋga na u jaŋga,
na u kawako kee nyjɛ u pe kre,
oo yi yo mbakɔ biile
mblɛ pe paan pre pan.
5 Wra mbra le Israel leele pan,
mna yo pe pan
na pe pe biile nyina mbra yire.
6 Mbe pre mbakɔ biile nyina yi yi,
mbe pre yiri
mbe pre biile nyina yi yi.
7 Mbe ki ti pe yiri mbe peyɛ wru,
mbe taa o Tafun Nyiɛkpɔɔ wre na,
mbe pia u kee nyjɛ u pe yire fɛɛ,
la, mbe pe jaa taa u mbra yire na.
8 Mbe pia kɔɔ pe na
pe tolɛɛlɛ pre plɛ lɛ.
Pe plɛ pra ndikana pe,
mna yiri mu Nyiɛkpɔɔ taan,
pe nsra lɛɛ wɔ mu taa u kro,
a pe nsra kpra li u yiɛ.
9 Ephraim leele pre,
pe bɛŋɛ na snimi yii na wii,
a pra fɛ mu ndru
pe kro ŋunɔ wi ble.
10 Nyiɛkpɔɔ nyu nunu kee
ŋga wra yo kre,
pe nsra li ki na, a pe nsraa chaa
mbe taa u mbra yire na.
11 Kee nyjɛ wra pe yire pra yi fɛɛ,
a u kawako kee nyjɛ wra pe kre,
pe nsra yi sɔɔnri.
12 Wra kawako kee pe
pe tolɛɛlɛ pre nu,
Zoan ŋga kii wa Egypt tra nu kre,
na wra yire kee yire pe.
13 Wra epo yɔ,
a pra nyaari mu tro ki lam,
wra tia epo nyumu kre na yire,
na mboo yi.
14 A wra tia tlo na yiɛklu
pe pan lafo na.
Na ble wɔ mbe u ti kanhun
na nyini nyjeeri mbe praa nyaa.
15 Wra dnɛ yɔ fimi tra kre nu,
a nyumu na yili ki nu
mu pan tataara na epo nyumu yi,
a pra gbɔ.
16 Wra tia dnɛ kre na yɔɔlɛ,
a nyumu na yili ki nu
mna pe na lɔɔ yi.
17 La, pra je mna kro na sisam pini,
na u taanla.
Jaŋgafun Nyiɛkpɔɔ wre,
pra yiri mu u taan fimi tra kre nu.
18 Pra tuwi mna Nyiɛkpɔɔ penle,
mna u wie sro ŋga niŋge
kraa wa pe na.
19 Pra paara mna u taan mbo,
“Nyiɛkpɔɔ we jaa o ŋga sro
fimi tra ŋga nu ra?
20 Ŋga wra dnɛ kre gbun kre,
nyumu na yili ki nu,
mu pan tataara na lɔɔ yi,
kena we jaa u leele ŋga sro,
na kaara mbe yaa?”
21 Ŋga o Tafun Nyiɛkpɔɔ wre
na ki loo kre, u krɔ na kun,
a wra tia kanhun na pan
mu u leele pre sro,
u krɔ na kun na pe ni kpɔɔ.
22 Ŋgi na hin? Pe nsra u shɔnli,
a pe nsra shɔnli na we jaa pe shɔ.
23 Wra paara,
a nyjeeri krɔɛ na nyaala.
24 Mna tia sro ŋga pe yeeri manna,
na yiri nyjeeri mu wo tra pe pan,
a pra yoori mu ka.
Wra pe ŋga nyjeeri sro,
a pra li.
25 Pra nyjeeri bitumblɔ sro li,
wra pe ŋga sro a pra li mu yɔɔ.
26 Wra tia yila finhaa fuflɛ na gbun,
mna u jaŋga tɛɛ
mu tapan haa fuflɛ tini mu pan,
27 mna tia kaara na wo
pe pan tataara, na tanyiɛ yi.
Wra tia hanyiɛlɛ tataara na pan,
mu wo pe pan
na epo nyu tanyiɛ yi.
28 Pe yonyi nyinyi yire lawee,
wra tia yira pan mu wo,
mna fɛ mu pe tnihɛɛ kun.
29 Pra ka mna yɔɔ mu tro.
Ŋgi na hin?
Wra pe ŋga pe niŋge sro.
30 Ŋga praa wa na pe niŋge sro lii,
a sro yire naa wa pe nyuu kre,
31 Nyiɛkpɔɔ krɔ na kun na pe ni,
a wra faŋgafɛɛnlɛ na yirifumblɔ
mblɛ praa wa pe nu kre gbo.
32 Yire kee nyjɛ krɛrɛ kɔkro kre,
pra kro mu na sisam pini,
u kawako kee yire kɔkro kre,
pe nsra u shɔnli.
33 Wra ka kun pe ble
nyjɛ pie li yire na,
a wra tia kanyana kumu
naa pe foni.
34 Na Nyiɛkpɔɔ plɛ gbo
kre hamblɛ pre we na u haa chaa.
Pie kna nyaanyaa
mbe paan taa u na.
35 Na ki pan ma, mbe pe sɔɔnri,
na Nyiɛkpɔɔ wi pe lefun,
na wre Jaŋgafun wre wi pe shɔfun.
36 La, nyu kee pe yuu waara,
kala pe fnɛ na u nyina,
37 pe n lɛɛ wɔ mu taa u na,
a nyu nunu ŋga wre na pre pe kre,
pe n li ki na.
38 La, ŋga u lam tna kre ndra na,
wra tɔ pe sisam na,
u nsra pe kla.
Wra gbun fɛɛri nyjila tataara nu,
a u nsra tia u krɔ na kun na pe ni.
39 Wra sɔɔnri na
wejikaara waara lɛ,
pan pe nyi na fuflɛ ŋga ki tro mbe sɛ,
a kia ndru ki kro na yi.
40 Gbee mni pra ndikana pe u na,
mna u le fooro nu
fimi lawee kre nu hin?
41 Pra kro mu na Nyiɛkpɔɔ
pini na le suwi,
Israel Nyiɛkpɔɔ cheche wre,
pra tia u krɔ na kun.
42 Pe nsra u jaŋga ŋga ni wra pe wɔ,
mu yili pe loŋgoolo kɛɛ kre sɔɔnri.
43 Ŋga ble wra kawako kee pe,
Zion na Egypt tra nu kre,
44 wra tia lɔɛ na kaari nyimi,
a pe nsra ja mu gbɔ yi nu.
45 Wra tia shunshɔɔnlɔ tataara,
na pan mu pe tɔɔra,
a kpanhɔɔnlɔ na pan
mu tra kre tɔ poŋgo.
46 Wra tia kpaae na pan mu yirɛ ka,
mna tia kpatɔ na pan
mu pe sroe kla peii.
47 Wra tia nyiɛ subie na wo,
mu pe tinyi sɛnyi
nyjɛ ni pe simi soori,
na tinyi bie nyjɛ pe lii kro kla.
48 Nyiɛ subie yire na
wo mu pe nui gbo,
a nyiɛtwanraa
na pe katoo yurɛ gbo peii.
49 Wra u krɔkuɔn sisaa kre wɔ
mu pe nyina,
a yɛnyiɛ na wejiwrɛm na pe da.
Nyjeeri bitumblɔ mblɛ pe leele
kuu na le pe nu.
50 U nsra gbun fɛɛri na,
a u nsra pe shɔ kumu kɛɛ,
la, wra tia yira sisaa
na pan mu pe gbo.
51 Wra bijlo ŋmba wraa wa,
Egypt leele pre sele nu kro gbo.
52 Mna u leele pre wɔ soo,
mna yiɛklu pe pan
fimi lawee yire nu,
na mbaala lefun u mbaala yiɛklu.
53 Wra kɛ tɔ pe na chiriri,
a fiɛrɛ nsra pe yii.
La, pe loŋgoolo pre rɛ,
epo na pe li peii.
54 A wra pan na u leele pre ni
u tra cheche kre nu.
Kre tra kre naa wa nyuɛ lawee,
a wra wi mu ki shɔ.
55 Wra tra kre leele ni pe yiɛ,
mna ki yɔɔlɛ mu pe ŋga,
a pra ki ta na krɔyirɛ yi.
A wra tia Israel sele yire,
na tni pe kalonyi nu.
56 Pra yiri mu Nyiɛkpɔɔ
Jaŋgafun wre taan,
mna u pe mu le,
a u kee kre, pe nsra li ki na.
57 Pra pe na pe tolɛɛlɛ pre lɛ,
mna yiri mu u taan.
Pe nsra kpra li,
pan pra pe na snimi ŋga ki n sin yi,
mna mu ki wa kre, kia sɛ wa.
58 Pra sɛɛnlɛ sin,
mna sragbuɛnlɛɛ sin na prɛ woni,
mna tia u krɔ,
na u yenyjam yiri u nu.
59 Wra pe kee yire nya,
a kra tia u krɔ na kun kpɔɔ,
a wra u leele
Israel wolo pre je poŋgo.
60 Wra u tnihaa
ŋga kraa wa Shiloh na kre,
yoŋgo nyuŋgo ŋga nu
wre Nyiɛkpɔɔ na nyi,
mu tni u leele nu kre ti.
61 Nyu nunu pee daka,
ŋga nu Nyiɛkpɔɔ jaŋga,
na u yɛnyiŋge na nyi kre,
wra tia loŋgoolo pre
na ki wru mu sɛ.
62 U krɔ na kun
na wre titi leele pre ni,
a wra tia pe loŋgoolo na pe gbo.
63 Pe nyanyjɛbɛɛlɛ na to to
ŋunɔ peii,
a kra tia pe bichabɛɛlɛ nsra ja,
mbe bijam pe mbe mɛɛ kɔ na.
64 Pe srawɔfɛɛnlɛ na ku
brɔfiɛn nyu na,
a pe chiɛlɛ nsra ja mbe nyɛni.
65 Nyiɛkpɔɔ na tin mu yiri,
na ndro gbɔ mu to mu sni na yirii,
na pɔɔrɔ kee pini na tro.
66 Wra u loŋgoolo pre gbun,
a pra ndru pe kro,
na nyifɛɛrɛ kpɔɔ ni.
67 La, wra Joseph sele leele pre je,
a u n na Ephraim sele kre wɔ.
68 La, wra Judae sele kre wɔ,
a Zion nyua ŋga u kori kre,
69 bawa wra u Suminyuŋgo sin
gedeŋge.
Wra ki sin a kra yire gbiŋmbi,
na tra yi nyjila kro nu.
70 Wra u sumifun David wɔ,
wra u yeeri, na uu wa
na mbaala kɔɔnri.
71 Wra u yeeri,
na uu wa na u mbaala le,
mna pan mu u pe Israel ŋunu,
mbe u paan pe
Nyiɛkpɔɔ leele lefun.
72 David na pe le na lɛɛ nunu ni,
mna pe le imi na ki fna.