Asaph mɛɛ ŋga wra kɔ mu Jeduthun Ŋga.
77
Mbe mana kpɔɔ tɛɛ mbe nyɛni,mbe Nyiɛkpɔɔ yeeri
mbe u paan ya ni na,
mbe u yeeri, a we loo ni pan.
2 Ni kanyana nyjila nu,
ndaa o Tafun Nyiɛkpɔɔ
wre haa cha.
Ndaa kɛnyi yire nyjeeri,
mna u yeeri lafo na blee,
la, ni nsra wejinyiŋge ta.
3 Na ni ni Nyiɛkpɔɔ kee sɔɔnri,
mbe ndaa jiin lɛɛ,
na ni u kee jawa,
mbe ni ŋumu fun ni nu.
4 Nyiɛkpɔɔ mu tia
mba jaa nyiɛlɛ tɔ mbe ŋnu,
a jawala tia mba jaa nyu nyaa
mbe paara.
5 Ni ble na yɛlɛ nyjɛ yi tro,
mu sɛ fafa yire sɔɔnri.
6 Ndaa sni mu jawa lee,
hali mna kee tataara jawa
dɛŋglɛ na blee,
mna niyɛ wie na,
7 “Kena o Tafun Nyiɛkpɔɔ wre,
we o je nyjila kro nu ree?
Kena wa o dumi na ra?
8 Kena u koroo ŋga ki n wa,
na nyukɔɔrɔ ni kre kɔ ree?
Kena u nyu ŋga u yo kre,
ki n wa na ra?
9 Kena Nyiɛkpɔɔ u foorochiɛn
kre fɛɛ ra?
Kena u krɔkuɔn wru mu tɛɛ
u latam kre titɛɛ ra?”
10 A ndaa kna mu yo na,
“Kee ŋga ki ni jawala tɔɔra yi na,
kena Nyiɛkpɔɔ Jaŋgafun wre n wa
na jaŋga ni na ree?
11 O Tafun Nyiɛkpɔɔ, mbe mu kee
nyjɛ mu pe yire krɛrɛ sɔɔnri.
Kawako kee nyjɛ mu pe fafa yire kro,
mbe yi sɔɔnri.
12 Kee nyjɛ mu pe yire kro,
mbe tni mbe yi jawa,
mu kekpɔɛ nyjɛ mu pe yire kro,
mbe yi jawa kpɔɔ.”
13 Nyiɛkpɔɔ mu kolo kro pe cheche,
a sɛɛn wa jaa pe na ŋu wi.
14 Ŋu wi Nyiɛkpɔɔ
ŋmba mu kawako kee pini.
Mu tia waŋgra leele mu jaŋga nya.
15 Mu jaŋga ŋga kii wa mu pan,
kre ni mu tɛɛ mu mu leele shɔ,
Jacob na Joseph nanae pre.
16 Nyiɛkpɔɔ, ŋga epo
na mu nya kre, kra fiɛ,
a yi latɛɛ na seeri.
17 A tloe naa paan nyiɛ,
a nyiɛ na twanri na nyini,
na shie na paan.
18 O mu twanraa kre loo,
legboo fuflɛ nu,
a nyiɛ nyi tra ŋga kro na,
a tra na seeri.
19 Mu koloo wa epo na,
a mu nyaari mu tro
nyumu yiɛ na,
la, mu dumble wa nya.
20 Mu yire Moses na Aaron na,
mu mu leele yiɛ klu
na mbaala lefun wi.