Asaph mɛɛ ŋga wra kɔ.
74
Nyiɛkpɔɔ, mni a mu o jekuraa ŋga hin?
A mu krɔ we kun na mu leele ni,
mbe sɛ su nyjila kro nu ree?
2 Mu leele mblɛ mna wɔ fa,
mbe pe pe mu wolo pre sɔɔnri.
Ŋu mna pe shɔ mu yili tnibim nu,
mbe pe pe mu kɛ leele.
Zion nyua
ŋga na mna tni kre sɔɔnri.
3 Nyaari nyaanyaa mu pan mu le,
o loŋgoolo pan mu yirɛ
nyjɛ yii wa mu Suminyuŋgo wa
yire kla peii.
4 Mu loŋgoolo pre gblee kpɔɔ wru,
mu pan mu le Suminyuŋgo wa,
mu pan mu pe sɛɛnlɛ tɛɛ wa,
na nyina na pe o ja.
5 Pe gbaanlɛɛ wru
na tinyi chanfɛɛnlɛ lɛ,
na tinyi chaa na tro.
6 Yirɛ nyjɛ pe tinyi tɛɛ mu tɛ,
mu ki san yire kro,
pe gbaanlɛɛ tɛɛ
mu yi chile mu wo.
7 Pe kanhun le
mu Suminyuŋgo kre na,
mu mna pe mu mɛɛ yeeri kre
tɔ nɛɛrɛ ni.
8 Na yuu pe jawala nu mbo,
“E ti mbe o yi kla peii.”
Lawee nyjɛ nu pe fni na mu sumi
tra kre nu kro, pe yi sro peii.
9 Sɛmbɛɛrɛ yira ka n wa o pan na,
a mu kee nyanyofun wa n wa na.
Ki tia ndro n wa o nu mu chin,
ŋga ble yire kee nyjɛ nyu we to.
10 Nyiɛkpɔɔ, nyjila ŋgi nu loŋgoolo
pre we mu tɛɛ mbe sɛ su hin?
Pan loŋgo wre we kro
mbra mu tɛɛlɛ suwi ree?
11 Mni a mu kɛnyi pɔ kro hin?
Mu kɛnyi yire saanla
mu pan mu pe kla.
12 Ŋu Nyiɛkpɔɔ,
ŋu wi ni ŋunu mu yire fafa,
ŋu mu paan na ŋmaashɔmu ni
tra ŋga na.
13 Ŋu mna mu jaŋga tɛɛ,
mna epo yɔ shiin,
mna yurɛ badɛmblɛ
mblɛ pee wa ki nu gbo.
14 Mna dɛnkɛ kpɔɔ wre ndra juari,
mna tia wra kaari
fimi yurɛ kaara.
15 Ŋu mu bloe na lɔɛ bɛɛlɛ
nyjɛ yi fuu wɔ,
mu tia lɔɛ badɛnyi
nyjɛ yi fuu yire yua.
16 Mu wo yi nyisee,
a mu wo yi blee.
Ŋu mu yila na nyiɛpɔ wa.
17 Ŋu mu tra sam krɛrɛ gbun,
a ŋu mu ndram wrɛmu nyjila,
na weere nyjila pe.
18 O Tafun Nyiɛkpɔɔ,
sɔɔnri na mu loŋgoolo pre na
mu pe mu tɛɛ.
A le imi na daŋgoolo pre
mu le fiɛn mu da.
19 Jande, mu leele pɔlɛfɛɛnlɛ pre,
maa pe ti pe loŋgoolo
ndra shelifɛɛnlɛ pre kɛɛ,
a mu leele mblɛ pe fiŋge pre,
maa shia pe fɛɛ.
20 Mu nyu nunu ŋga mna pe
na o ni kre sɔɔnri,
Ŋgi na hin? Lawee ŋga nu
wɔmu nyi tra ŋga na kpan,
ndra shelifɛɛnlɛ pre sɛ bawa nyi.
21 Maa ti mbe nyifɛɛrɛ
mblɛ pe kala nyaa pre gbo.
Ti mbe shianfɛɛnlɛ na kanyanafɛɛnlɛ
pre mu ŋga mɛɛ.
22 Nyiɛkpɔɔ, yiri mu mu
loŋgoolo kala li.
Sɔɔnri na jijiele pre
mu pini na tɛɛ nyjila kro nu.
23 A maa shia mu loŋgoolo
krɔkuɔn gblee ŋga pe leni
nyjila kro nu kre fɛɛ.