HLƐ TAARƐ WO
(Mɛɛ Hlɛ 73–89)
Asaph mɛɛ ŋga wra kɔ.
73
Kpra na, Nyiɛkpɔɔ nyumu Israel leele ŋga,
mblɛ pe fraka pre kro,
u nyu mu pe ŋga.
2 La, ni dankna
ŋga ndaa ta Nyiɛkpɔɔ nu,
na ni shɔnlie ŋga ndaa ta kre
na kɔ ni nu.
3 Ŋgi na hin?
Ŋga ndaa sisampefɛɛnlɛ nya,
imi na praa peyɛ lii,
na peyɛ kpɔɔri kre,
ni yiɛ na nyina pe na.
4 Pe n naa fnai,
a nde pra yire yire mu faŋga ta.
5 Kanyana ka nsraa wa pe na,
imi na leele hamblɛ
pre kala nyaa kre, a pe n na yaa.
6 Pe yɛkpɔɔmu nyu
na lagboo kaari yi.
Pe pɔɔrɔ kakrɔɛ pe pe pan
na dodonyi yi.
7 Hankɛ kee bribri yii wa
pe lolonyi nu,
a sisam kee nyjɛ yii wa
pe jawala nu yire,
yi n wa na nyu ni.
8 Pe leele pini na tɛɛ, na kefuɛn
nyjɛ pe jawa na pe ni yuu,
na nyukpɔɔmu kee yuu.
9 Pan pe kefuɛn yuu Nyiɛkpɔɔ
ŋmba uu wa nyjeeri wre na,
na kee nyjɛ pe chaa yuu
leele pan tra na.
10 Ki tia Nyiɛkpɔɔ leele kuraa,
kna mu taa pe kee yire na,
mu yi shɔ mu li.
11 A pre sisampefɛɛnlɛ pre kna
na yuu mbo, “Nyiɛkpɔɔ n chin
kee ŋga ki pini jawalaa wa
ŋmba uu wa nyjeeri
wre pan ree?”
12 Pan sisampefɛɛnlɛ pre nyi,
nde wejiŋge nyjii pe na,
a pra taa na yaa pe yirɛ na.
13 Kpra na,
finfin ni ni loloŋgo pe cheche,
mu ni kɛnyi je
mu yili nɛɛrɛ kee nu mu tni.
14 Blenyini ŋga ni kala nyaa,
bnimi kpan, ni ndie tiniɛ taa
Nyiɛkpɔɔ pan.
15 Na ni yo mbe yire kee nyjɛ yo kre,
mba pe na mu leele pre wa wi.
16 Ndaa tni mu yire kaalɛɛ
nyjɛ krɛrɛ jawa,
la, kra sheli mu ni ŋga na
mbe yi nɔɔloo,
17 mna sɛ su na ndaa sɛ
mu Suminyuŋgo wa.
Bawa ndaa chin mu nɔɔloo ta,
mna chin mu sisampefun
taahaa nya.
18 Yɛŋgɛ yi na mu sɛ pe yire
lawee ŋga ki pe plɔplɔ nu,
mbe pe mbulɔ to mbe yirii pra.
19 Nyiɛkpɔɔ mu pe kla nyaanyaa,
a kee ŋga kie pe nya kre
we pe fiɛrɛ ni mbe tro.
20 Imi lewo ŋunɛ ŋnu yira ni,
mbe yiri bnimi
mbe ki cha mbe la kre,
pan pe nyi, o Tafun Nyiɛkpɔɔ.
Na mu taan mu yiri,
ma pe nya na.
21 Fooro ni loloŋgo nyi,
a ni gbun na ni sroi,
22 a ni daŋga na yurɔ wi,
a ni nsra mu nɔɔloo.
23 Ni nsra laa mu na,
ki tia mna ni yii na mu kɛ ni,
24 A mu mu nyu kee tɛɛ mu ni pɔɔri,
a mu ni shɔ mbe ni ŋga yɛnyiŋge.
25 Nyiɛkpɔɔ, na ŋu bɔkɔ,
ndro n wa ni pan nyjeeri wa.
Kena na ni mu ta wa mu kɔ,
kena ni n yaka shian tra mna na.
26 Faŋga wa pe ni nu na,
la, Nyiɛkpɔɔ wi ni faŋga,
a wre chiin ni chaa.
27 Mblɛ pe mu je pre we fun,
a mblɛ pe yili mu jaara,
mu sɛ na sɛɛnlɛ sumi pre kro,
mu pe kla.
28 La, mi rɛ, ki nyu mu ni ŋga,
na ni mbra ŋu,
Jaŋgafun Nyiɛkpɔɔ wre na,
a mu kɛ tɔ ni na, mbe ni jaa kee
nyjɛ mu pe yire kro kpali.