Mɛɛ ŋga Solomon na kɔ.
72
Nyiɛkpɔɔ, U ŋunu nyinambe u jaa kpra kun,
ŋu titi kofrakaa na,
mu ya u pɔ na mbe u fraka.
2 Ti mbe u fraka
mbe jaa mu leele le.
Ti mbe u fraka
mblɛ pe kala nyaa pre yiɛ.
3 Ti mbe tra kre nyu,
mbe ki leele ŋmaashɔmu nya.
4 Ti mbe u kanyanafɛɛnlɛ kala li,
kpra kolo na,
mbe shianfɛɛnlɛ ŋmaa shɔ,
mbe u mblɛ pe kanyanafɛɛnlɛ tɔɔra
pre kla poŋgo.
5 Nyiɛkpɔɔ ŋga yila na nyiɛpɔ
wa na nyaa ŋga,
lewo we mu fiɛ
mbe sɛ su nyjila kro nu.
6 Ti mbe ŋunu wre pe na nyiɛ ŋga
ki paan tra ŋga ki yua na yi.
7 Ŋmba u fraka we uyɛ ta
ŋunu wre nyjila,
mbe wejinyiŋge pan, mbe sɛ su
na waa nyiɛpɔ nya nyini ni na.
8 We ŋunumu li mbe yire epo na
mbe sɛ su epo na,
hali mbe yire lɔɔ na
mbe sɛ su tra nyukɔɔrɔ na.
9 Leele mblɛ pee wa mu tni
fimi lawee tra yire nu,
we kosie kan u yiɛ,
a u loŋgoolo we paan to u yiɛ
mbe u sumi.
10 Ŋulo we yiri Tarshish,
na kuyɔɔsu chiɛ na,
mbe paan u kɛ yirɛ.
Pan chɔɔ Sheba, na Seba ŋulo
we paan u kɛ na.
11 Ŋulo kro kro we paan
kosie kan u yiɛ,
a waŋgra leele kro
we paan u sumi.
12 A shianfɛɛnlɛ mblɛ pe nyɛni
na u yeeri kre, we shɔ pe pan,
pre na kanyanafɛɛnlɛ
mblɛ pe n yafɛɛnlɛ ni kro.
13 We pɔlɛfɛɛnlɛ na shianfɛɛnlɛ
kro fooro chin,
mbe shianfɛɛnlɛ pre shɔ
kumu nu.
14 We pe shɔ kanyana nu,
na mblɛ pe pe tɔɔra kro kɛɛ.
Ŋgi na hin?
Pe ŋmaa kee sheli u na.
15 Ŋunu ŋmaa ki tnu mbe pe paan
u kɛ Sheba swanyiɛ.
Leele kro pe nyiɛtali mbe u ŋga,
mbe Nyiɛkpɔɔ u dwan blenyini.
16 Bleju nyjɛ pe luu tra kre na,
yire nyu, hali mbe sɛ su
nyuɛ yire na,
mbe yi sɛ na Lebanon tinyi yi,
mbe leele nɛɛ kakpɔɛ yire na
na nyaa yi.
17 Ŋunu mɛɛ ki tni nyjila kro nu,
mbe u mɛɛ ta mbe sɛ su
na waa yila nya na nyini ni na.
Waŋgra leele kro we Nyiɛkpɔɔ tali
mbe u pe dwan,
imi na u ŋunu dwan kre.
18 O Tafun Nyiɛkpɔɔ wre,
Israel leele Nyiɛkpɔɔ wre
wo yi mɛɛ.
Wre chiin u kawako kee pini.
19 Wre wo yi mɛɛ
na yɛnyiŋge blenyini.
A u yɛnyiŋge we tra ŋga nyi poŋgo,
Ami, Ami, Ami.
20 Jesse pɔ David wre
nyiɛtalaa nyukɔɔrɔ yi kre.