Lewo Ŋmba U Lɛ Nyiɛtalaa Nu
71
O Tafun Nyiɛkpɔɔ,ŋu mbe fɛ mbe sɛ kaari,
maa shia ti
mbe nyifɛɛrɛ ni gbo fio.
2 Ŋga mu fraka kre ndra na,
ya ni na mu ni shɔ,
loo ni pan mu ni ŋga ŋmaa.
3 Ŋu jaara ni paan na ndra,
a ŋu mu kɛ toni ni na.
Paara mbe ni ŋmaa ta. Ŋgi na hin?
Ŋu wi yira ŋga na ni gbun,
na ni fɛnkaari.
4 Ni Nyiɛkpɔɔ, ni wɔ mu yili
sisampefɛɛnlɛ pre kɛɛ.
Ni shɔ hankɛ leele
ndrasheleefɛɛnlɛ pre kɛɛ.
5 Ŋgi na hin?
Ŋu o Tafun wi ni dankna,
a ŋu na ni kaan mu yire ni bimi.
6 Mu yire ni se ble,
kre ni niyɛ wru mu taa mu na.
Ŋu mu ni wɔ ni lo lɛɛ, ki tia
mbe mu ŋga mɛɛ nyjila kro nu.
7 Ni kee lenɛɛrɛ pe kawako ni.
Ŋgi na hin?
Ŋu jaara ni paan na ndra.
8 Blenyini ŋga ni mu kaan mɛɛ,
na mu yɛnyiŋge kre kee kpali.
9 Ŋga ni lɛ blɛlɔɔ
a ni faŋga kɔ ni nu ŋga,
maa shia ni wa.
10 Ni loŋgoolo ni chaa mbe gbo,
pe nyu nunu pe na ni chaa,
11 na yuu mbo, “Nyiɛkpɔɔ laa u kro,
e ti o u ni mbe sɛ u yii,
ndro n wa mbe u shɔ.”
12 Nyiɛkpɔɔ, ni Nyiɛkpɔɔ,
maa ti mbe mu haale na ni ni,
pe nyaanyaa mu pan,
mu ya ni na.
13 Mblɛ pe ni chaa kala ni
pre we pra, a pie kla.
Nyifɛɛrɛ we mblɛ pe ni chaa
sisaa ni pre kro gbo.
14 La, mbe dankna mu na
nyjila kro nu,
a mba fna mu mboo ŋgaa na.
15 Mbe mu frakaa kre kee yo.
Blenyini ŋga,
mbe mu ŋmaashɔmu kre kee yo.
Ŋgi na hin?
Kee ŋga mu pe kre kpɔɔ ni pan.
16 O Tafun Nyiɛkpɔɔ Jaŋgafun,
mbe mu jaŋga kee
nyjɛ mu pe yire kpali.
Ŋu chiin kee mbe yo.
17 Nyiɛkpɔɔ, mu yire ni bimi
mu ni nyina,
a nii wa na mu kawako kee
nyjɛ mu pe yire kee yuu.
18 Nyiɛkpɔɔ, fuŋgaami ŋga ni lɛ,
a ni ndra nyjure fniŋge.
Maa ni wa, imi kie pe mbe ni jaa
mu jaŋga na mu kawako kee yo,
mblɛ pee wa kro
na paan pre kro pan.
19 Nyiɛkpɔɔ, mu jaŋga kee
nyjɛ mu pe yiree wa
mu sɛ su nyiɛ yiɛ na.
Mu kekpɔɛ pe, a wa n wa
mu da na mu ni.
20 Ŋu mu tia ni kala nya tataara,
la, ŋu mu ni wɔ yi nu,
a mu ni ŋga faŋga,
mu ni wɔ mu yili kumu nu.
21 Ŋu mu ni ŋga kpɔɔmu
mu wɛ ni fa na,
mu ni ŋga gbunyiŋge.
22 Ni Nyiɛkpɔɔ, mbe juru tɛɛ
mbe mɛɛ kɔ mbe mu mɛɛ yile.
Mu kpra ndra na, mbe biŋge gbun,
mbe mɛɛ kɔ mbe mu ŋga.
Ŋu wi Israel Nyiɛkpɔɔ,
ŋmba mu pe cheche wre.
23 Na ni mɛɛ koni na mu kaan kre,
yɛshɔɔrɔ gblee ki yili ni nyuu,
Ŋgi na hin? Ŋu mu ni shɔ.
24 Blenyini ŋga
mbe mu frakaa kre kee yo.
Ŋgi na hin?
Mblɛ pe ni chaa mbe kla pre,
mu tia nyifɛɛrɛ pe gbo,
a pe jawala fun pe nu.