Mɛɛ ŋga David na kɔ.
69
Nyiɛkpɔɔ ni shɔ,Ŋgi na hin?
Nyumu ni yii yulɔ nu.
2 Ni to frɛrɛ nu, a tra waa n wa
mbe ni jele kɔ mbe kan.
Ni to latɛɛ nu, a nyumu na ni lii.
3 Ni nyɛni chiin mu fna,
a ni lagboo jaara sɛ yua.
Ni nyiɛlɛ nyaa
mu Nyiɛkpɔɔ le kolo chiin,
a yi fna ni na.
4 Leele mblɛ pe ni pra finfin
pre nɛɛ mu wɛ
ni ndra nyjure na.
Faŋgaa wa ni loŋgoolo nu,
a pra ni chaa mbe gbo,
na kala fnɛ na taari ni na.
Yira ŋga ni n ju kuraa kre,
pie ti mbe ni ki fɔlɔ tɔ jaŋga na.
5 Nyiɛkpɔɔ, mba jaa ni sisam
ndra mu na.
Mu chin imi na ni daŋga mu da.
6 O Tafun jaŋgafun Nyiɛkpɔɔ,
maa ti mbe mi ndra na,
mbe nyifɛɛrɛ
mblɛ pe mu shɔnli pre gbo.
Israel Nyiɛkpɔɔ, maa ti
mbe ni mblɛ pe mu haa chaa
pre yiɛ le nyumu.
7 Mu ndra na leele ni tɛɛlɛ,
nyifɛɛrɛ na ni kuu nyjila kro nu.
8 Ni lobiile nu kuraa kre,
ni pe na fuŋu wi.
Hali ni sɛ pe na waŋgra ka nu
ni yiri mu pan mu chaa,
ni sele leele nu.
9 Nyiɛkpɔɔ, mu katoo
kre keshian na,
ni gbun ni sroi na kanhun yi.
A tɛɛlɛɛ nyjɛ pe mu tɛɛlɛ yire kro,
mi na pe nyi.
10 Na ni nyɛnɛɛ tɛɛ mu blefun,
mbe ki kaari ni pan tɛɛlɛɛ.
11 Na ni kumu yoŋgo wru mu tɔ
na fooro lii ni sisam na,
mbe praa ni pini mbra tɛɛ.
12 Ni kee leele yuu chia lam na tro,
a gbɔgbɔɔlɔ ni le mɛɛ nu.
13 La, ŋu ni Tafun,
mbe nyɛni mbe mu yeeri,
mbe mu mu dumiɛ nyina.
Mu koroo kre saara na, loo ni pan,
mu ni shɔ. Ŋgi na hin?
Mu mu nyu yo na mu ni shɔ.
14 Nyiɛkpɔɔ, ni shɔ mu yili
fiɛrɛ ŋga ki ni yii ŋga nu.
Maa ti mbe ki ni li.
Ni shɔ mu yili mblɛ pe ni pra pre,
na nyumu ŋga ki ni lii kre kɛɛ.
15 Maa ti mbe lɔɔ ŋga ki nyi kre ni li,
ndee mbe latɛɛ ni li,
a maa ti mbe ni le faŋga nu.
16 O Tafun, mu nyɔɔ o na.
Mu koroo kre saara na,
loo ni pan.
Mu dumiɛ kre na,
yiɛ kna mu ni le.
17 Maa yiɛ wɔ mu sumifun na,
jande loo ni pan nyaanyaa,
Ŋgi na hin? Nii wa kanyana nu.
18 Pan mu ni shɔ ni loŋgoolo kɛɛ.
19 Nyiɛkpɔɔ mu nya imi pe ni tɛɛlɛ
mu tia nyifɛɛrɛ ni gbo,
a ni n yɛnyiŋge ka ni ndro pan na.
Ŋu Nyiɛkpɔɔ,
mu ni loŋgoolo kro chin,
20 Tɛɛlɛɛ we ni gbo,
ki tia sra wɔ ni na.
Ŋmba we ni fooro le
mbe ni gbunyiŋge ni chaa,
la, ni n wa ta.
21 Pe yira susrom le ni sro nu,
mu ni nyumu ŋga mbe gbɔ
kaari tuwe ŋga ki taan nyanya.
22 Ti mbe sro taan ŋga pe lii
kre pe kla,
mbe pe yɛshɔɔrɔ li ble
kaari pe pan pɛlɛ.
23 Ti mbe pe fun nyiɛlɛ na,
mbe pia na nyaa,
mbe pe sɛkɛɛn kru,
mbe yia jaa fraka na.
24 Ti mbe mu krɔkun na pe ni,
mbe mu yiɛ nyina pe na kpɔɔ.
25 Ti mbe pe tnihaa kaari kataa,
mbe ndro wa kro
mbe tni pe nyinyi nu.
26 Ŋgi na hin? Mblɛ ndie mu tinii pre
pe pe leni kanyana nu,
a mblɛ mu tia pra kala nyaa pre,
pe pe kee yuu.
27 Ti mbe pe ndie tiniɛ kpɔɔ,
a maa pe ŋga kolo mbe pe pan
mu ŋmaashɔmu kre nu.
28 Ti mbe pe pe mɛɛ wɔ
ŋmaa hlɛ kre nu,
a maa ti mbe pe pre na mu leele
mblɛ pe fraka pre mɛɛ chaa titɛɛ.
29 Ni kala nyaa titi,
ni ŋga ŋmaa mbe ni wuu.
30 Nyiɛkpɔɔ, mbe mɛɛ kɔ
mbe mu mɛɛ yile,
a mbe ŋga mu pe yo
mbe mu ŋga mboo.
31 Kre kie o Tafun wre yiɛ nyi,
mbe wɛ ŋga mbe
nablɛm chichie tɛɛ
mbe sra wɔ mbe u ŋga na.
32 Na shianfun ki nya ma kre,
mbe uyɛ shɔ.
A kie mblɛ pe Nyiɛkpɔɔ haa chaa
kre le gbeŋmbaa.
33 Mblɛ pe shian kre,
o Tafun wre ndru pe pan,
a mblɛ pe leni nyuŋgo pre,
wraa pe fɛɛ.
34 Mblɛ pee wa nyjeeri na tra kro
we u ŋga mɛɛ,
hali epo na yirɛ
nyjɛ yii wa ki nu kro.
35 Ŋgi na hin? O Tafun Nyiɛkpɔɔ,
wre we Jerusalem shɔ,
mbe ndruu Judae
chiɛ yire kro sin na.
Mbe u leele tni yi na,
mbe tra kre pe pe wo.
36 U sumifɛɛnlɛ pre nanae
we tra kre ta,
mbe mblɛ pe u kori
pre tni ki na.