Mɛɛ ŋga David na kɔ.
68
Na Nyiɛkpɔɔ yiri mu yire,mbe u loŋgoolo fɛ mbe nyina,
mbe mblɛ pe u pra
pre na feni mbra ndra.
2 Nyiɛkpɔɔ, imi na fuflɛ wree foo
na woni kre, pe pe ma.
Imi na kanhun srɛ kanya
nyani kre,
pan chɔɔ sisampefɛɛnlɛ
we pe mu yiɛ.
3 La, mblɛ pe fraka pre yiɛ we shɔ,
mbe yɛshɔɔrɔ li mu yiɛ,
mbe pe yɛshɔɔrɔ sisaa ti,
mbe pe wejinyi saan pe na.
4 E mɛɛ kɔ e Nyiɛkpɔɔ ŋga,
e mɛɛ kɔ e u mɛɛ yile.
E ŋmba u nyaari tloe nu
na paan wre kolo gbeele.
U mɛɛ yi o Tafun Nyiɛkpɔɔ.
Kena e ti mbe e yiɛshɔ u yiɛ.
5 Nyiɛkpɔɔ wa u Suminyuŋgo
cheche kre nu, a wre wi bijile lɛ,
a wre wi lekuchiɛlɛ lefun.
6 Nyiɛkpɔɔ foorofɛɛnlɛ
kaan lawee mbe pe tni,
na mblɛ pe yiri na leni nyinyi nu
pre woni, na yɛshɔɔrɔ ni.
La, leele mblɛ pe yiri
na Nyiɛkpɔɔ taanla pre,
tra ŋga ki n tna na pie tni.
7 Nyiɛkpɔɔ, ŋga mna yiɛklu
mu leele pan,
a e na tro fimi lawee yire nu kre,
8 tra na seeri,
a nyiɛ na pan tra kre nu,
ŋga Nyiɛkpɔɔ Sinai nyua kre
tnifun wre naa paan
kre ndra na,
9 wra nyiɛ pan mu wo u tra
ŋga kraa klai kre na,
a kra ndru mu nyu.
10 A u leele na tni ki na,
a u lɛɛtnam kre ndra na,
wra nyu kanyanafɛɛnlɛ na.
11 O Tafun Nyiɛkpɔɔ paara,
a chiɛlɛ tataara ya,
a pe u kee kre kpali mbo,
12 “Ŋulo na pe ŋunɔwifɛɛnlɛ feni
na nyina.”
A chiɛlɛ mblɛ pee wa mu tni katoo,
pe ki yire yɔɔlɛ mu ta.
13 Yirɛ nyjɛ pe pe na swafiŋge ni,
na katoo kotulo lɛ,
a pe kuɛn na chiɛnri
na swanyiɛ yi kre.
A mni a e plɛ tni mbaala nagbɛɛ
a e n sɛ ŋunɔ hin?
14 Ŋga Jaŋgafun Nyiɛkpɔɔ wre
na ŋulo gbun mu gbo
Zalmon nyua kre na kre,
pe kajle naa wa mu wo wa
na fniŋgei na nyiɛsubie yi.
15 Bashan nyuɛ kpɔɛ yire gede
imi na ki fna.
16 Yira ŋgi ki tia a e nyini sisaa tɛɛ,
na nyua ŋga na Nyiɛkpɔɔ chaa
mbe tni kre le ma hin?
17 O Tafun Nyiɛkpɔɔ sookɛɛ
nyjɛ ni u wii yire,
ndro wa jaa yi nyu chin,
a we yire Sinai nyua kre na
mbe paan tni
u Suminyuŋgo cheche kre nu.
18 Ŋga mna sɛ nyjeeri kre,
mna leele yii mu ya muyɛ na,
a leele na mu kɛ yirɛ,
hali mblɛ pra yiri mu mu taan
pre kro na mu kɛ.
19 E o Tafun wre,
o ŋmaashɔfun Nyiɛkpɔɔ
wre ŋga mɛɛ,
wre u o kanyana shɔ
mu tio nyjila kro nu.
20 O Nyiɛkpɔɔ wre,
ŋmaashɔfun Nyiɛkpɔɔ wi.
Wre wi o Tafun ŋmba u o woni,
na yilii kumu nu.
21 Kpra na, Nyiɛkpɔɔ we u loŋgoolo
ndrɛ gbun mbe juari,
mblɛ pie kro mbra sisaa pini kre.
22 O Tafun wre yo mbo,
“Mbe sɛ e loŋgoolo wru
Bashan na mbe pan na,
hali na epo tapan pe nyi kuraa kre,
mbe sɛ pe wɔ mbe pan,
23 mbe e nyaari pe nyimi nu,
mbe e nyikaanla
pe nyimi gbɔɔ pra.”
24 Nyiɛkpɔɔ, ŋu wi ŋunu,
a lenɛɛrɛ taa mu kro,
na shie mu Suminyuŋgo wa
a pe pe nya.
25 Mɛkɔmblɔ yiɛklu,
a bnɔ fɔfɛɛnlɛ kro tɔ,
a pe bichabɛɛlɛ na binyi gbuun.
26 Na e fni e Nyiɛkpɔɔ ŋga mɛɛ,
Israel leele, mna ee fni kpan,
e o Tafun wre ŋga mɛɛ.
27 Benjamin sele ŋga kii fiɛn kre
leele yiɛklu,
a Judae sele yɛkulo pree
wa mu chaa,
a Zebulun na Naphtali
loplombo taa.
28 Nyiɛkpɔɔ, mu jaŋga nyina,
Nyiɛkpɔɔ, mu faŋga nyina,
imi na mna ki wɔ
mu o nyina fa kre.
29 Ŋulo we paan mu kɛ yirɛ
mu Suminyuŋgo wa
Jerusalem na.
30 O Tafun, Egypt leele
yiɛ kee yo pe pan,
pe kaari yurɛ sisɛɛ
mu sɛ ja kpaa nu,
pre pe peyɛ pe na nui kpɔɛ
na pe biile mblɛ pe chaa
na kaa lɛ,
pe yiɛ kee yo pe pan,
mu hɛ su nyjila ŋga ni pie pan
na pe swɛ ni mbe paan mu sumi.
Pre leele mblɛ pe chaa
mbe ŋunɛ wi na mu ni
pre kro gbun mu nyina.
31 Ŋunu bituŋu we yiri Egypt na
mbe paan mu sumi,
a Ethiopia leele
we paan kosie kan mu yiɛ.
32 Ŋunumu lie nyini
nyjɛ yii wa tra na kro,
e mɛɛ kɔ e Nyiɛkpɔɔ ŋga.
33 Wre u tro fafa nyiɛ yiɛ na kre.
Wre u yire nyiɛ yiɛ na mu fuu,
a pe u mana loo.
34 E Nyiɛkpɔɔ jaŋga kee ŋga u pe yo,
u yɛnyiŋgee wa Israel leele kro,
a u jaŋgaa wa nyiɛ yiɛ na.
35 Nyiɛkpɔɔ, mu kee fiɛrɛ ni,
mu Suminyuŋgo cheche kre nu.
Israel Nyiɛkpɔɔ wre u leele kaan
jaŋga na faŋga,
kena e u ŋga mɛɛ.