Mɛɛ ŋga David na kɔ.
66
Leele mblɛ pee wa tra na kro,e yɛshɔɔrɔ kpɔɔ tɛɛ
e Nyiɛkpɔɔ ŋga mɛɛ.
2 E mɛɛ kɔ e u mɛɛ ŋga yɛnyiŋge,
e u ŋga mɛɛ, e u le yɛnyiŋge.
3 E yo Nyiɛkpɔɔ pan,
na u yirɛ nyjɛ u pe
yire kee fiɛrɛ ni,
a u jaŋga kpɔɔ, a ki tia
u loŋgoolo kro we fiɛrɛ tɛɛ,
mbe paan kosie kan u yiɛ.
4 Waŋgra ŋga leele kro we u sumi,
mbe mɛɛ kɔ mbe u mɛɛ yile.
5 E pan e kee nyjɛ Nyiɛkpɔɔ pe le,
imi na u kee nyjɛ u pe leele nu,
yire pe kawako ni mu da.
6 U tia epo nyumu kɔ a tra waa sni,
a leele nyaari mu tro ki nu,
ki tia o yiɛshɔ u na.
7 U jaŋga kre saara na,
u ŋunumu lii ki kolo na
nyjila kro nu.
A leele mblɛ pe n u chin pre,
kee nyjɛ pe pini yire u yi nyaa,
a ndro wa jaa yiri mbe u taan.
8 Leele kro,
e o Nyiɛkpɔɔ wre ŋga mɛɛ,
e ti mbe pe u mɛɛ kre loo kpɔɔ.
9 O ŋmaa wa u kɛɛ,
a waa gbro mbe to fio.
10 Nyiɛkpɔɔ, imi na pe swanyiɛ pini,
na nɛɛrɛ woni ki nu kre,
pan mu o pini na le.
11 Mu tia pe o ta mu yii
mu le nyuŋgo,
a o kala nya tataara.
12 Mu tia o loŋgoolo nduu o na,
a o tro kanhun, na nyumu nu,
la, fuŋga mu o shɔ
mu pan na o ni lawee
ŋga nu yirɛ kro bɔ nu.
13 Kena mbe paan yurɛ sroo sra wɔ,
mu Suminyuŋgo wa
mbe mu ŋga,
a yirɛ nyjɛ nyu ni wru mu pan yire,
mbe yi wɔ mbe mu ŋga,
14 Nyjila ŋga ni ndaa wa
kanyana nu kre,
ndaa nyu yo mu pan,
kena mbe yi wɔ, mbe mu ŋga.
15 Mbe mbapilɛ mblɛ nu nyina nyi
tɛɛ mbe srawɔ mbe mu ŋga,
mbe nabilɛ na kapilɛ tɛɛ
mbe srawɔ mbe mu ŋga.
16 Yire mblɛ e Nyiɛkpɔɔ fiɛ
kre kro e pan,
mbe ni kee ŋga Nyiɛkpɔɔ pe
mu ni ŋga yo mbe e loo.
17 Ndaa nyɛni mu u yeeri,
mna mɛɛ kɔ mu u mɛɛ yile.
18 Na kra pe na sisam naa wa ni nu,
Nyiɛkpɔɔ wa na loo ni pan.
19 Yɛŋgɛ na,
Nyiɛkpɔɔ ndie tɛɛ ni pan,
mu ni nyiɛtalaa loo.
20 Ni Nyiɛkpɔɔ kaan mboo,
na u n ndie wɔ ni nyiɛtalaa na,
ndee mu ni tɔ u koroo kre kolo.