Mɛɛ ŋga David na kɔ.
65
Nyiɛkpɔɔ, ki fna mbe o yireZion na, mbe mu ŋga mɛɛ,
mbe o nyu nyjɛ o yo mu pan
yire wɔ mbe mu ŋga.
2 Ŋu mu lewo nyiɛtalaa ndru,
a ŋu jaara lewo kro we fɛɛ pan.
3 O sisam wɛ o na,
a ŋu mu o hakɛ kro tii na o kee.
4 Mblɛ mu wɔ mbe pe paan tni
mu cheche lawee kre nu pre
wo yi dwamu.
Mu katoo yirɛ chichiele yire
we o yɔɔ,
a mu Suminyuŋgo cheche kre nu
oo dwamu ta.
5 Nyiɛkpɔɔ ŋu wi o ŋmaashɔfun,
mu kawako kee na mu o shɔ,
a ŋu na waŋgra leele kro dankna,
hali mu sɛ lawee kro nu.
6 Mu faŋga ni mu tɛɛ,
mu nyuɛ yire yi yirehaa
mu yi tɛɛ mu mu jaŋga nyina.
7 Mu tia epo nyumu mbapilɛ
nyjɛ yi waa kro nyu ku,
a mu tia leele mblɛ pe paan
na kakrɔ ni pre nyu ku.
8 Kekpɔɛ nyjɛ mu pe yire,
yi waŋgra ŋga leele kro pe kawako,
a pe yire na le.
Leele yire yilafinhaa, na yilatohaa,
na mɛɛ koni yɛshɔɔrɔ ni,
mu kee nyjɛ mu pe yire na.
9 Mu nyiɛ paan na woni tra,
a ŋu mu tra le a ki tna.
Nyiɛkpɔɔ, ŋu mu tia
lafoelee nyi nyumu,
a mu tia shɔlɔ bɔ,
ŋu mu tia yire kee
nyjɛ krɛrɛ pan ma.
10 Mu tia nyiɛ pan imi na ki fna,
a nyumu tra da,
a yirɛ nyjɛ o luu ki na kro nyu.
11 Mu nyu o na mu tia
o sro ta tataara,
lawee ŋga nu mu tro kpan
sro bɔ.
12 Mu tia nui nɛɛ pe kahɛɛ nu,
a yɛshɔɔrɔ pan
nyambie lawee yire nu.
13 A mbaala o tra kre tɔ poŋgo,
a shɔlɔ bɔ landɛɛ yire nu kro.
Yira kro na yɛshɔɔrɔ kpɔɔ lii,
na mɛɛ koni.