Mɛɛ ŋga David na kɔ.
64
Nyiɛkpɔɔ loo ni pan,mu ni nyiɛtalaa loo,
jande ni ŋmaa shɔ
mu yili ni loŋgoolo kɛɛ.
2 Ni wɔ mu yili sisampefɛɛnlɛ jina
nyjɛ pe tuuri, na kefuɛn
pefɛɛnlɛ tataara fnimu nu.
3 Pe pe ndile liɔ,
na brɔfiɛn yiɛ shiin yi,
a pe nyu kee pe na snimi
ŋga kie jaa ndro gbo yi.
4 Pe sɛ ndra mu na lewo ŋmba
u n sisaa ka pe wre chaa
mbe gbo, hali pe n na fiɛ.
5 Pe gbeŋmba nyjila kro nu,
mbe sisaa pe,
na yuu peyɛ pan na pie ndra,
mbe leele pɛɛri pɛɛlɛɛ,
“A ndro wa o nya.”
6 Pe sisam jina tuuri,
mbra yuu peyɛ pan mbo,
“Jawala ŋga o wru ŋga ki nyu titi.”
E tio kpra yo,
lewo jawala n nyu.
7 La, Nyiɛkpɔɔ we pe ŋu snimi ni,
yie pe suulo pia ki nyjila chin.
8 Pe nyu kee ndra na,
we pe kro kla,
a mblɛ pie pe nya pre,
we na ndra gbuun.
9 Leele kro we fiɛ, mbra kee
ŋga Nyiɛkpɔɔ pe kre jawa,
mbra ki kee yuu leele pan.
10 Mblɛ pe fraka pre yiɛ we shɔ,
kee ŋga Nyiɛkpɔɔ pe kre na,
mbe pe fɛ mbe sɛ u jaara
mbe u pe shɔ.
A mblɛ pe nyu pre kro,
we Nyiɛkpɔɔ ŋga mɛɛ.