Mɛɛ ŋga David na kɔ mu Jeduthun ŋga.
62
Ni pe kommna Nyiɛkpɔɔ yiɛ le,
mbe u ni shɔ,
wre chiin na ni niyɛ wru mu taa.
2 Wre chiin u kɛ toni ni na,
a wre wi ni lefun,
na ni ŋmaashɔfun,
yaka n wa mbe ni ja.
3 Nyjila ŋgi nu
ee mi ndro nunu ŋmba,
tɔɔra mbe sɛ su hin?
Mii ŋmba ni yire
na mboo juaraa yi.
4 Pe jina to mbe ni kɔ,
ni kpɔɔmu tnimu
ŋga nu ni nyi nu.
Kafinɛ na pe yiɛshɔ,
pe nyu ni pe lewo dwan,
nde pe lam rɛ,
suni pe leele suni.
5 Yɛŋgɛ na,
Nyiɛkpɔɔ chiin na ni yiɛ nyi,
wre chiin na ni dankna.
6 Wre chiin u kɛ toni ni na,
a wre wi ni lefun,
na ni ŋmaashɔfun,
yaka n wa mbe ni ja.
7 Wre kɛɛ ni ŋmaashɔmu,
na ni yɛnyiŋge kro nyi.
Wre wi ni lefun,
na ni fɛndra haa.
8 Nyiɛkpɔɔ leele,
e dankna u na nyjila kro nu.
E e keshiɛn kro yo u pan.
Ŋgi na hin?
Wre wi o fɛnkaarifun.
9 Lewo na nyjuro pe na nyu fuflɛ yi,
lepɔɔ o, Tnu o, pe kro n pe yaka.
Na mu pe le yira nu mu pe kra,
mu nya na lewo n pe yaka yira.
10 Yaa eyɛ wru mbe taa dnumu lie,
ndee juuro na.
Hali na mu krɔyirɛ nɛɛ
mni na mni,
maa shia muyɛ wru
mbe taa yi na.
11 Nyiɛkpɔɔ paara,
a ni loo gbee tataara,
na wre Nyiɛkpɔɔ wo yi jaŋga,
12 a u koroo kpɔɔ,
o Tafun Nyiɛkpɔɔ,
ŋu mu lewo kaan fɔtɔɔrɔ
ŋga ki fna na u ni.