Mɛɛ ŋga David na kɔ nyjila ŋga Saul na leele tun mbe pe sɛ u tɔ u katoo mbe u gbo.
59
Nyiɛkpɔɔ, jande ni shɔmu yili ni loŋgoolo kɛɛ,
kɛ tɔ ni na mblɛ pe yiri
mu ni taan kre kɛɛ.
2 Ni shɔ mu yili sisampefɛɛnlɛ,
na linkufɛɛnlɛ pre kɛɛ.
3 Le, ndrashelifɛɛnlɛ yiri
mu ni taan.
Na ni sri mbe ni gbo,
ki n pe sisaa ka ni pe pe.
4 Ni n sisaa ka pe pe na,
ande pe peyɛ kna mbe ni tɔ.
Jande pan mu ya ni na mu ni le.
5 O Tafun Nyiɛkpɔɔ Jaŋgafun,
Israel leele Nyiɛkpɔɔ, yiri
mu waŋgra ŋga sisampefɛɛnlɛ
ndie tini, maa shia pe fooro le.
6 Pe paan yilakɔŋgɔ
mbra twanri na nyikaanla lɛ,
mbra feni mbra chia kre kuun.
7 Kekpɔɛ yi yilii pe nyuu,
pe nyu kayolo pe na brɔfiɛn yi,
pe n chin na leele
pe kee yire ndru.
8 La, o Tafun Nyiɛkpɔɔ,
mu pe le na pe tɛɛ,
leele mblɛ pe n mu chin pre kro,
pe kee titɛɛrɛ ni mu pan.
9 Nyiɛkpɔɔ, ŋu wi ni faŋga,
a ŋu wi ni fɛnkaarifun.
10 Ni Nyiɛkpɔɔ ni kori,
a we ya ni na mbe ti ni niyɛ li,
ni loŋgoolo pre na.
11 Jande Nyiɛkpɔɔ, maa shia pe gbo,
na kre ma ni leele pre we fɛɛ.
O Tafun Nyiɛkpɔɔ, mu jaŋga tɛɛ
mu pe gbun mu nyina.
12 Sisam kee bribri yii wa pe nyuu.
Pe yii pe kpɔɔmu kee
nyjɛ pe pini,
na kekpɔɛ nyjɛ pe yuu
o na yire na.
Pe kala fnɛ na taari o na,
na o suni.
13 Krɔ tɛɛ mu pe kla. Pe kla poŋgo
mbe waŋgra leele kro nya,
mbe chin na ŋu Nyiɛkpɔɔ wi
Israel leele ŋunu.
14 Pe paan yila kɔŋgɔ mbra twanri
na nyikaanla lɛ,
mbra chia feni mbra kuun.
15 Pe feni na tro mbra sro chaa,
a na pe n ta mu li mu yɔɔ,
mbe pra twanri.
16 La, mi rɛ, mbe mɛɛ kɔ
mbe mu faŋga kre kee yo.
Mbe mɛɛ kɔ bnimi,
mbe mu koroo kre kee yo.
Ŋgi na hin? Ŋu wi ni lefun.
17 Nyiɛkpɔɔ ŋu wi ni lefun
na ni fɛnkaarifun,
mu koroo kre ndra na
mbe mɛɛ kɔ mbe mu mɛɛ yile.