Mɛɛ ŋga David na kɔ.
58
Yire jaŋgafɛɛnlɛ,e kpra yuu ŋgaa?
Kena e kpra pimi kuun ŋgaa?
2 Ɔɔhɔn, sisam kee chiin e jawa
mbe pe,
a pɔɔrɔ kefuɛn e pini tra kre nu.
3 Sisam kee sisampefɛɛnlɛ pini
pe tnimu kro nu.
A pe seble pe yire mu na kala fnɛ.
4 Pan pe nyu kee nyi
na wɔɔ sisaa saŋmbɔ yi,
a pan pe kepele nyi na dɔɔdɔɔ
ŋmba wraa loo wi,
5 wa dobodobo wɔfun kee
nyjɛ u yuu loo.
6 Nyiɛkpɔɔ, pre jirae fiɛrɛfɛɛnlɛ
mblɛ ŋgaala pile pe nyuu.
7 Ti mbe pe fun na lɔɔ
ŋga nyumu ki kɔ ki nu yi.
Na pe pe bɛnyi kru mbe wa kre,
ti mbe pe snimi nyu pin.
8 Ti mbe pe pe na koklo
ŋmba pe taan mu ja,
a wra bublɔ wi,
mbe pe pe na bikpɔlɔɔ wi,
mbe pia daa yila nya.
9 Pre naa yo pie chin kre,
na mu pe chieri
mu wo na nyaa yi.
Krɔ tɛɛ mu pe fɔ
na nyu fuflɛ ni mu wo,
na pee wa na le nyiɛlɛ ni.
10 Na pe waa na sisampefɛɛnlɛ
ndie tinii kre,
mblɛ pe fraka pre yiɛ we shɔ.
Pie nyaari sisampefɛɛnlɛ
pre nyimi nu.
11 Leele we nya mbe yo na yɛŋgɛ na,
Nyiɛkpɔɔ mblɛ pe fraka
pre kaan fɔtɔɔrɔ chichie.
Kpra na, Nyiɛkpɔɔ wa na
leele kpra kuun tra ŋga na.