Mɛɛ ŋga David na kɔ nyjila ŋga ni wra fɛ Saul kɛɛ mna sɛ le dnɛ wee.
57
Nyiɛkpɔɔ, jande ni fooro le.Ŋgi na hin?
Ŋu jaara ni fɛ mu pan,
mu kuɛn jaara ni fɛ mu le,
mbe sɛ su na fuflɛ kpɔɔ
ŋga ki ni gbuun ŋga nyu we ku.
2 Jaŋgafun Nyiɛkpɔɔ wre
ni nyɛni na yeeri,
a wre u ni kaan
yirɛ nyjɛ yi ni shian.
3 We yire nyjeeri mbe loo ni pan,
mbe paan ni shɔ.
We mblɛ pe ni chaa mbe kla kre,
gbun mbe nyina.
Nyiɛkpɔɔ we ti ni u koroo,
na u kpra nya.
4 Nii wa loŋgoolo
mblɛ pe pe na jirae lɛ lalaa,
pe ŋgaala pe na chombo
na snimi yi.
Pe ndile tna
na brɔfiɛn yiɛ shiin yi.
5 Nyiɛkpɔɔ, mu mɛɛ kpɔɔ
mu sɛ su nyjeeri.
Ti mbe tra ŋga leele kro
mu yɛnyiŋge nya.
6 Pe ni pɛɛri pɛlɛ mbe ni yii,
a ki tia ni sɔɔnrɔ ku.
Pe wee tuu ni kolo na,
a pre titi kna mu sɛ to ki nu.
7 Nyiɛkpɔɔ, ni dankna mu na kpɔɔ,
kena mbe mɛɛ kɔ
mbe mu mɛɛ yile.
8 Ni nyiɛ yiri. Gbolo mu yiri,
mu juru gbun, mu biŋge gbun.
9 O Tafun Nyiɛkpɔɔ,
mbe mu ŋga mboo,
mbe mu ŋga mɛɛ
leele mblɛ pe n mu chin nu.
10 Mu dumiɛ kpɔɔ mu sɛ su nyjeeri,
a lawee ka n wa,
a mu kpra n da wa.
11 Nyiɛkpɔɔ, mu mɛɛ kpɔɔ
mu sɛ su nyjeeri.
Ti mbe tra ŋga leele kro
mu yɛnyiŋge nya.