Mɛɛ ŋga David na kɔ nyjila ŋga ni Philistine leele na u yii Gath na.
56
Nyiɛkpɔɔ ni fooro le.Ŋgi na hin? Lewo na nyjuro
ni chaa mbe kla.
Blenyini ŋga, ni kɔŋgɔ pe nini.
2 Blenyini ŋga, ni loŋgoolo
mblɛ pe ni haa chaa,
mbe ni to pre nɛɛ mu wɛ ni na.
3 Ŋga ble fiɛrɛ we ni yii kre,
mbe niyɛ wru mbe taa,
ŋu Jaŋgafun Nyiɛkpɔɔ wre na.
4 Wre na ni dankna,
ki tia ni n na fiɛ.
Kee nyjɛ u yo mu tɛɛ yire ndra na,
mbe u ŋga mɛɛ, a mba fiɛ.
Ŋgi lewo na nyjuro
we jaa ni pe hin?
5 Blenyini ŋga,
ni loŋgoolo n na ni tii,
sisam bribri ni pe ni jawa.
6 Pie fni mbe sɛ ndra mbra ni sri,
mbra ni dumble tɔɔnri,
mbra ni chaa mbe gbo.
7 Nyiɛkpɔɔ, pe sisam ndra na,
pe ndie tini,
mu krɔ tɛɛ mu pe ndie tini.
8 Mu ni kanyana chin rɔ,
ni nyɛnɛɛ nyjɛ ni nyɛni kro
mu yi nyu chin,
mu yi nyunɔ mu hlɛ nu.
9 Ni chin na Nyiɛkpɔɔ wa ni kro,
ki tia ble ŋga na mbe nyɛni
mbe u yeeri,
ni loŋgoolo we fɛ mbe ndru kro.
10 Nyiɛkpɔɔ we ti
mbe ni yire u nyu kee na,
mbe u ŋga mɛɛ.
11 Wre na ni dankna, ki tia mba fiɛ.
Yira ŋgi lewo na nyjuro
we jaa ni pe hin?
12 Nyiɛkpɔɔ, yira ŋga nyu ni yo
mu pan kre,
mbe mu ŋga ki yi.
Ni mboo ŋgaa kre,
mbe mu ŋga ki yi.
13 Ŋgi na hin?
Mu ni wɔ mu yili kumu nu,
mu ni shɔ ni gbrontoo kɛɛ,
mu tia ndaa nyaari mu yiɛ chiriri,
mu na nyaari mu nyisee
ŋga ki tia leele na nyaa kre nu.