David mɛɛ ŋga wra gbun na juru ni.
55
Nyiɛkpɔɔ jande ndie tɛɛmu ni nyiɛtalaa loo,
a maa muyɛ ndra ni na.
2 Ndie tɛɛ mu loo ni pan,
ni jawala kee wɛ ni na,
ki tia ndaa fnai.
3 Ni loŋgoolo na sisampefɛɛnlɛ
tia ndaa kala nyaa.
Pe tia wuo n wa ni kee nu.
Pe krɔ tɛɛ mu ni pra.
4 Ni gbun yɔɔlɛ ni na,
a kumu fiɛrɛ wa ti
mbe ni niyɛ ta.
5 Fiɛrɛ ni yii mu tia ndaa seeri,
hali titɛɛ n wa ni pan.
6 Na ndaa wa na kuɛn ni
na katoo kotro wi,
mbe na yiri mbra sɛ
lawee ka cha mbe wuu.
7 Mbe na yiri mbra sɛ haalee
fimi lawee ka nu,
mbra sɛ tni wa.
8 Mbe na fɛ nyaanyaa mbra sɛ ndra,
mbra yili fuflɛ kpɔɔ
ŋga ki ni waa ŋga kɛɛ.
9 O Tafun Nyiɛkpɔɔ,
ni loŋgoolo jawala gbun
mu chaa,
mbe pia jaa paaraa chiriri paara.
Ŋgi na hin? Ni kakrɔ, na kee
nyjɛ yi n fna nya chia kre na.
10 Lafo na blee, pee wa na feni
na chia kre kuun.
Ki tia kanyana na sisam bribri
yii wa ki na.
11 Lewo kla kee bribri
yii wa chia kre na.
Jaŋga lie, na fana kee
yii wa ki lete na.
12 Na kra pe na ni loŋgo,
ndee ni prafun
wraa ni pini na tɛɛ,
ndee mna yiri mu ni taan kre,
mbe na frɔ ta,
ndee mbra lawee chaa sɛ ndra.
13 La, ŋu ni tnifun, ni nyaarifun,
na ni nunu titi,
ŋu mu ni pini imi?
14 Mi na ŋu o bɔɔnrɔɔ
chichie bɔɔnri, mbe taa oyɛ na,
mbe sɛ Nyiɛkpɔɔ katoo.
15 Nyiɛkpɔɔ, maa ti ni loŋgoolo ble
nyjɛ pie li tnu.
Ti mbe pe ku nyaanyaa.
Ŋgi na hin?
Sisam wa pe lolonyi nu,
a pan yii wa pe tnihɛɛ nu.
16 Mbe nyɛni mbe ni Tafun
Nyiɛkpɔɔ yeeri, a we ni shɔ.
17 Bnimi, lafo na blee,
mbe nyibinyiɛ tɛɛ mbe nyɛni
mbe u yeeri, a we loo ni pan.
18 Loŋgoolo mblɛ mi na pre wii
pre nɛɛ, la, we ni shɔ
mbe ni ŋga wejinyiŋge.
19 Nyiɛkpɔɔ wre u ŋunumu li
mu yire fafa, we loo ni pan,
mbe wi mbe pe ja,
Ŋgi na hin? Pia pe jawala chinɛ,
a pe n na u fiɛ.
20 Ni nunu yiri mu u nɔɔlɔ taan,
a u n li u nyu kee ŋga u yo na.
21 U nyu kee tna,
la, prara kee wa, u loloŋgo nu.
U nyu kee tna
na brɔfiɛn yiɛ shiin yi.
22 Mu kanyana kee ti,
mu o Tafun Nyiɛkpɔɔ wre ŋga,
we ki yo mbe mu ŋga,
Ŋgi na hin? Wa ti mbe pe
ŋmba u fraka wre ja fio.
23 La, Nyiɛkpɔɔ we sisampefɛɛnlɛ
pre kla, mbe pe le wee.
Nyimi knanwofɛɛnlɛ,
na kafinɛfɛɛnlɛ pre,
wa ŋmaa li mbe sɛ yiɛ.
La, mi rɛ, ŋu na ni kaan.