Mɛɛ ŋga David na kɔ nyjila ŋga ni Edom ndro Doeg na sɛ yo Saul pan na David sɛ Ahimelech katoo.
52
Lewo na nyjuro jaŋgafun,mni a mu sisam tɛɛ
na muyɛ kpɔɔri ma hin?
Nyiɛkpɔɔ dumiɛn wa
nyjila kro nu.
2 Nyjila kro nu mu jawa
mbe ndro taa kla,
mu nyu tna na brɔfiɛnklo
ŋga nyu ki tna mu tro yi,
a mu kala fnɛ nyjila kro nu.
3 Mu sisam chaa mu wɛ chichie na.
Mu kafinɛ kori mu wɛ kpra na.
4 Lewo denyjuufun,
mu nyu kee ni mu leele klai.
5 Nyiɛkpɔɔ we mu gbun
mbe chan tra, mbe ma yiri na.
We mu yii mbe mu wɔ mu tnihaa,
mbe mu wɔ waŋgra ŋga nu kuraa.
6 Na ki pan ma,
leele mblɛ pe fraka pre we fiɛ
mbe u pe mbra tɛɛ, mbra yuu na,
7 wre ndro ŋmba, u n sra uyɛ wru
mu taa Nyiɛkpɔɔ na.
Wra uyɛ wru mu taa yirɛ nyjɛ u ta na,
mu yire sisam kolo na mu uyɛ ta.
8 La, mi rɛ, pan ni nyi na
olive tiŋge fɔŋgɔ yi,
na lee Nyiɛkpɔɔ jaara.
Mbe niyɛ wru
mbe taa Nyiɛkpɔɔ dumiɛ na,
nyjila kro nu.
9 Nyiɛkpɔɔ, kee ŋga mu pe
ŋga ndra na, mbe mu mɛɛ yile,
a mbe yire mu leele yiɛ na,
mbe yo na mu nyu.