Sisam Nyiɛtalaa
51
Nyiɛkpɔɔ, mu korookre saara na,
ni fooro le.
Mu dumiɛ kpɔɔ kre le,
mu ni sisam pɔ mu laa ni na.
2 Ni weli mu yili ni sisam kro nu,
ti mbe ni yili ni sisam nu
mbe pe chasi.
3 Ni ni sisam nya,
mu chin na ni sisam wa ni yiɛ
nyjila kro nu.
4 Ŋu chiin ni sisaa pe mu taan.
Ni kee ŋga ki n fna pe mu na.
Ki tia mu kpra li mu paaraa nu,
a mu kprakuɔn fraka.
5 Pra ni siire ta sisam nu,
a sisam nu pra ni se.
6 Kpra mu chaa ki yili ni nu,
kena ti mbe mu kachindɛ ni nyi.
7 Ni weli na hyssop ni mbe ni yili,
jande ni weli mbe ni foli,
mbe pe chasi mbe wɛ
nyiɛ subie na.
8 Ti mbe ni lɛɛnyiŋge
na yɛshɔɔrɔ kee loo,
hali imi na ni faŋga kɔ mu da kro,
ti mbe ni yiɛshɔ.
9 Yiɛ wɔ ni sisam na,
mu ni sisam kro je mu laa ni na.
10 Nyiɛkpɔɔ, ti mbe ni loloŋgo
pe chasi ni nu.
Ni ŋga ŋumu fɔŋgɔ ŋga ki yire.
11 Maa ni ni mbe flo mu yiɛ,
a maa shia mu Kpra Ŋumu wre
wɔ ni nu.
12 Ti mbe ni lɛɛnyiŋge ta,
mu ŋmaashɔmu kre nu,
mbe ni ŋumu ŋga kie ndie tɛɛ
mu pan ta na.
13 Mbe leele mblɛ pe fun
mu kee kre na
pre nyina mu kolo,
mbe ki ti mbe sisampefɛɛnlɛ
jaa da mu na.
14 Nyiɛkpɔɔ,
ni ŋmaashɔfun Nyiɛkpɔɔ
ni shɔ linkuuro sisam nu,
mbe ni ni ndile tɛɛ
mbe yɛshɔɔrɔ mɛɛ kɔ
mbe mu frakaa kre kee yo.
15 O Tafun ni nyu nyaa,
mbe ni jaa mu mɛɛ yile.
16 Mu n na yurɛ sra wɔɔ chaa,
mbe na sra wɔ mbra mu ŋga.
Pan chɔɔ mu yiɛ n shɔ
yurɛ sroo sra na.
17 Nyiɛkpɔɔ, sra wɔɔ ŋga mu chaa
yi na, lewo we uyɛ nyjii.
Ki tia loloŋgo ŋga ki kiyɛ nyjii,
mu chinɛ kre, ma ki je.
18 Nyiɛkpɔɔ nyu Zion chia kre na,
mu ya ki leele na.
Ti pe buŋgo sin mbe ki ki fɛ
mbe kun.
19 Kre mu yiɛ we shɔ sra wɔɔ chiriri,
na yirɛ sroo sra na,
kre pie jaa nabilɛ tɛɛ mbe sra wɔ
mu sragbunu kre na.