Kpra Sumiɛ
50
O Tafun Nyiɛkpɔɔ Jaŋgafunwre paara, na leele yeeri
mu yire yila yilihaa,
mu sɛ su yila tohaa.
2 Nyiɛkpɔɔ chiɛnri mu yili Zion
chia chichie kre na na paan.
3 O Nyiɛkpɔɔ wre paan,
a ndro kro we u gbra kun,
kanhun we yiɛklu u pan
mbra yirɛ shio,
mbe nyiɛ fuflɛ u fɛ mbe kun.
4 We nyjeeri na tra leele yeeri
mbe pe paan fni,
mbe u u leele kpra kun.
5 Nyiɛkpɔɔ yo mbo,
“E ni leele mblɛ pe fraka
pre nyu ble e ni ŋga,
ni leele mblɛ pe yire sra wɔɔ na,
a mi na pre nyu nunu pe kre.”
6 Nyjeeri yirɛ nyjɛ o nyaa yire,
Nyiɛkpɔɔ frakaa nyina,
a wre wi kpra kunfun.
7 Ni leele, e loo,
ni paan mbe paara.
Israel leele, e loo,
mbe dansiɛrɛ li mbe e taan,
mi wi Nyiɛkpɔɔ, e Nyiɛkpɔɔ wre.
8 Ki n pe yurɛ
mblɛ e kuu na ni kaan,
ndee yurɛ mblɛ e sroi na sra woni
na ni kaan kre na ni yila na
e yiɛ kee yuu e pan.
9 Ni n na nablɛm,
ndee kaplɔ chaa e nagbɛɛ.
10 Ŋgi na hin?
Nyaalam yurɛ kro, ni wolo lɛ,
hali nyuɛ kagben kagben yurɛ
mblɛ kro, ni wolo lɛ.
11 Hanyiɛlɛ mblɛ pee wa nyaa kro,
ni pe chin.
Yurɛ mblɛ pee wa nyaa kro,
ni wolo lɛ.
12 Na klo na ni ta, mba na e wie sro.
Ŋgi na hin? Waŋgra ŋga na yirɛ
nyjɛ yii wa ki na kro, ni wee yi.
13 Ni nablɛm kaara kaa ree?
Ndee ni kapilɛ nyimi gboo ra?
14 E ti mbe e mboo ŋgaa pe sra,
ŋga e woni na ni kaan.
Yira ŋga nyu ndro wru
mbe ni ŋga kre,
u ki wɔ mbe ni ŋga.
15 Na mu ni yeeri mu keshian nyjila,
mbe shɔ mu pan,
mbe mu ni ŋga yɛnyiŋge.
16 La, sisampefun rɛ,
Nyiɛkpɔɔ yo u pan na,
u n kolo ni,
na we na u mbra yire yuu nyu ni,
ndee mbe u nyu nunu kre kee yo.
17 Mu je na pia mu nyina kpra kre,
mu ni mbra yire je.
18 Ŋu na juolo e chaa na nyaari,
a ŋu na tiɛrifɛɛnlɛ
e kala nunu piin.
19 A sisam kee bribri mu yuu,
nyjila kro nu
kafinɛ kee yi yilii mu nyuu.
20 Mu jiin na mu lopɔ kee yuu,
hali mbe u dɔɔya.
21 Ŋga mu yire kee nyjɛ krɛrɛ pini
a ni pieri kre ndra na,
mu jawa na pan ni nyi na ŋu wi.
Mbe mu yiɛ kee yo mu pan,
mbe ti mu kee kro nya chasi.
22 Yire mblɛ e Nyiɛkpɔɔ je kre,
e loo, na kre ma,
mbe paan e knumu brobro,
mbe yaa shɔfun ta.
23 Ŋmba u mboo ŋgaa tɛɛ
na sra woni na ni kaan kre,
wre u ni leni yɛnyiŋge.
A mblɛ pe lii ni kee na kpra ni kre,
kpra na, mbe pe ŋmaa shɔ.