Mɛɛ ŋga Korah bibilɛ na kɔ.
49
Leele kro, e ndie tɛɛ e loo.Yire mblɛ ee wa tra yiɛ na,
e ndie tɛɛ.
2 Mblɛ pee mɛɛ ni,
na mblɛ pe n mɛɛ ni kro,
swafɛɛnlɛ na shianfɛɛnlɛ kro
e ndie tɛɛ.
3 Ni nyu we kachindɛ kee yo,
mbe ni jawala pe chasi.
4 Yomɛɛlɛ na mbe yiɛ tɛɛ fuŋga.
Na ni juru tɛɛ na mɛɛ gbuun,
mbe ndaa yi nɔɔ nyina.
5 Na ble sisaa to,
a ni loŋgoolo fɛ
mu ni kun kuraa mba fiɛ.
6 Pre pe peyɛ wru
mu taa pe wejiyirɛ na,
mu na peyɛ kpɔɔri yirɛ nɛɛrɛ
nyjɛ pe ta ni.
7 Lewo wa jaa uyɛ ŋmaashɔ,
ndee mbe lɔɔ
ŋga Nyiɛkpɔɔ u lɔ kre fɔlɔ tɔ fio.
8 Ŋgi na hin?
Ndrɔ ŋga ni Nyiɛkpɔɔ lewo lɔ
kre kpɔɔ.
Ki tia kolo kro na,
lewo wa jaa uyɛ ndra fɔlɔ tɔ,
9 mbe ki ti u jaa kro tra
ŋga na mbe wa ku.
10 Ndro kro chin na jijiele
na daŋgoolo kuu,
pan chɔɔ kachimblɛ kuu
na pe wejiyirɛ tii plɛ pan.
11 Pe jawala yi na,
pe nyinyi nyjɛ pe sin
yire we kro nyjila kro nu,
ndee pe tnihɛɛ yire wa kla fio,
a ki tia pe mɛɛ taa taa pe trɛ na.
12 Imi na lewo mɛɛ kpɔɔ
mu da kpan,
kia jaa ti u tni mbe wa ku,
pan we ku imi na yurɔ kuu kre.
13 Kee nyjɛ yie jijiele,
na mblɛ pe pe nyu kee ndru,
na taari pe kro kre nya yi kre.
14 Pie ku na mbaala lɛ,
ŋgi na hin? Kumu ki pe le,
la, leele mblɛ pe fraka kre,
we pe taanla mbe tro.
A pe nyumu kro we kla wee,
pia tnihaa ta tra ŋga na.
15 La, Nyiɛkpɔɔ we ni ŋmaa shɔ
mbe yili kumu kɛɛ.
16 Na lewo uyɛ ta, maa shia u fiɛ,
hali na u krɔ yirɛ nɛɛ
mni na mni, maa shia u fiɛ.
17 Na u ku, wa sɛ na yi ka ni,
kpɔɔmu ŋga we ta kre
wa taa u kro mbe sɛ.
18 Na lewo uyɛ ta,
mu uyɛ yiɛ nyi tra ŋga na,
a leele na u kpɔɔri
na u uyɛ ta kre,
19 u tolɛɛlɛ kɔŋgɔ we kɔɔ ni,
mbe sɛ kuulo nu.
Bawa wɔmu nyi nyjila kro nu.
20 Lewo kpɔɔmu wa jaa ti
mbe wa ku,
pan we ku na yurɔ wi.