Mɛɛ ŋga Korah bibilɛ na kɔ.
48
O Tafun Nyiɛkpɔɔ wre kpɔɔ,a ki fna o u ŋga
mɛɛ badaaŋga.
Uu wa mu tni u kakpɔɔ
ŋga kii wa u nyua cheche
kre ndra na.
2 Nyiɛkpɔɔ nyua Zion
kre na Jerusalem nyi.
Ki gede mu nyu imi na ki fna,
waŋgra kro yɛshɔɔrɔ lawee yi,
a ŋunu kpɔɔ wre chia yi.
3 Nyiɛkpɔɔ tia ndro kro u chin
chia kre na,
na wre wi fɛnkaarifun.
4 Ŋulo peyɛ nya mu fni,
mbe paan wi
na Jerusalem leele ni.
5 Ŋga pra pan mu chia kre nya kre,
a fiɛrɛ na tia pra fɛ.
6 Fiɛrɛ na seeree na tia pra pe na
chlɔ ŋmba u chaa mbe se wi.
7 Nyiɛkpɔɔ na pe pe na fuflɛ
epo nyumu wrui,
mbe ki jaa krɔɛ
nyjɛ yi tro ki yiɛ na kla.
8 Ŋga Nyiɛkpɔɔ pe kre
o ki loo, mu ki nya.
O Tafun Jaŋgafun wre chia kre,
u kɛɛ wa ki na nyjila kro nu.
9 Nyiɛkpɔɔ, oo yire mu
Suminyuŋgo,
mbe mu koroo kpɔɔ kre kee jawa.
10 Nyiɛkpɔɔ, imi na mu mɛɛ nyi kre,
pan oo mu ŋga mɛɛ
mbe sɛ su tra nyu na,
a mu fraka mu kepele kro nu.
11 E ti mbe Zion leele yiɛshɔ,
mbe Judae chia kre leele
yɛshɔɔrɔ kpɔɔ li. Ŋgi na hin?
Mu leele kala lii kpra ni.
12 E fɛ e Zion kun,
e yi nyinyi gedenyi
nyjɛ yii wa ki nu tɔɔnri.
13 E yiɛ wa e ki mboe nyjɛ pe sin,
mu ki fɛ mu kun yire le,
e kɔ e yi kee yo,
e biile mblɛ pee wa kro kre pan.
14 A wre Nyiɛkpɔɔ ŋmba,
o Nyiɛkpɔɔ wi nyjila kro nu,
a we pe o lefun nyjila kro nu.