Mɛɛ ŋga Korah bibilɛ na kɔ.
46
Nyiɛkpɔɔ wi o fɛnkaarifunna o faŋga,
wre u yaa o na o keshian nyjila.
2 Ki tia na tra seeri,
a nyuɛ na klɔ na tuuri epo nu,
3 a epo nyumu na mbapilɛ waa,
a nyuɛ na seeri kuraa kre,
waa fiɛ.
4 Lɔɔ ka nyumu paan na yɛshɔɔrɔ ni
Nyiɛkpɔɔ kakpɔɔ kre na,
u tnihaa cheche kre nu.
5 Nyiɛkpɔɔ wa kre chia kre na,
a pia ki kla fio.
Na ndram saan we paan ki le.
6 Waŋgra leele seeri,
a ŋulo ŋunumu lie na tuuri,
a na Nyiɛkpɔɔ fuu
mbe tra na nyani.
7 O Tafun Jaŋgafun wree wa
o mbɛɛ na.
Jacob Nyiɛkpɔɔ wre wi
o fɛnkaarifun.
8 E pan e o Tafun wre
kee nyjɛ u pe le,
imi na u tra kla mu da.
9 U ŋunɔ nyu gbo tra na,
u wifɛɛnlɛ yirɛ
nyjɛ ni pe wii kro kla.
A sookɛɛ nyjɛ ni pe wii yire kro,
u tia kanhun to yi na.
10 Nyiɛkpɔɔ yo mbo, “E pieri komm,
ee nya na mi wi Nyiɛkpɔɔ,
pie ni mɛɛ kpɔɔ
tra ŋga leele nu kro.”
11 O Tafun Nyiɛkpɔɔ Jaŋgafun
wree wa o nu.
Jacob Nyiɛkpɔɔ
wre wi o fɛnkaarifun.