Mɛɛ ŋga Korah bibilɛ na kɔ.
44
Nyiɛkpɔɔ, mu kawako keenyjɛ mna pe fafa,
o tolɛɛlɛ nyjila kre,
o yi loo na ndie ni.
O tolɛɛlɛ pre yi yo o pan peii.
2 Ŋu mna waŋgra leele pre ni,
mna mu leele, Israel leele
pre tɛɛ wa.
Mna waŋgra leele pre gbun
mu nyina,
mu tia mu leele pre nɛɛ
mu chirɛ.
3 Mu leele pre nsra ŋunɔ wiyirɛ
ndee mna faŋga tɛɛ
mu wi mna tra kre ta.
La, ŋu titi jaŋga,
na mu faŋga na yi.
Ŋgi na hin? Mna pe kori.
4 Ŋu Nyiɛkpɔɔ, ŋu wi ŋunu,
jande ti mbe mu leele wi mbe yili.
5 Mu jaŋga kre saara na,
mbe o o loŋgoolo ja.
6 Ni ŋunɔ wiyirɛ yire krɛrɛ,
ni n na kaan ka na,
na yie jaa ni shɔ.
7 La, mu o shɔ mu yili
o loŋgoolo kɛɛ,
a mblɛ pe o pra pre, mu pe ja.
8 Nyiɛkpɔɔ, ŋu oo ŋga mboo
na mɛɛ nyjila kro nu.
9 La, mu kɛ laa o na,
a o loŋgoolo o ja,
mu n wi na o loŋgoolo ni na.
10 Mu tia o fɛ o loŋgoolo yiɛ,
a pe o yirɛ koli mu sɛ.
11 Mu o gbun mu nyina
waŋgra fɔŋgɔ leele nu,
a pe o pe na mbaala
mblɛ ni pe shie gbo haa lɛ.
12 Mu mu leele pre ndrɔ pe yiɛyiɛ
na pe kee n tnu ni mu pan.
13 Kee nyjɛ mu pe o na kre,
o tnifɛɛnlɛ yi nya,
a mblɛ pe o fɛ mu kun kre,
na o pini na tɛɛ.
14 Mu tia leele mblɛ pe n mu chin
pre kee ta o na, na yuu,
na ndra nyaara o na.
15 Blenyini ŋga nyifɛɛrɛɛ wa
ni yiɛ na,
a nyifɛɛrɛ tia mba jaa ndra yire.
16 Ni loŋgoolo, na ni prafɛɛnlɛ pre,
kee nyjɛ pe yuu ni na,
na ni pini na tɛɛ yire
tia nyifɛɛrɛ na ni kuu,
a mba jaa ndra yire.
17 Yire kee nyjɛ krɛrɛ o da,
ande o n mu fɛɛ,
ndee mu mu nyu nunu
ŋga mu pe na o ni kre,
mu ki le kee waa.
18 O lolonyi n laa mu kro,
a o n mu kolo wa.
19 La, mu sɛ o wa komboolo nu,
mu tia ndram wɔ o na kprikpri.
20-21 Nyiɛkpɔɔ, na o na mu mɛɛ fɛɛ,
ndee mna sɛ na kɛ chaan
sɛɛnlɛ yiɛ, mu na o nya.
Ŋgi na hin? Lewo ndrandra kee
kro mu ki nyaa.
22 La, mu ndra na, pe o kuu blenyini.
Mu tia o sɛ pe na mbaala
mblɛ ni pe shie gbo haa lɛ.
23 O Tafun Nyiɛkpɔɔ yiri ɛ!
Mni a mu sni hin?
Jande nyi, maa o wa ma.
24 Mni a mu yiɛ wɔ o na,
mu o katala na o kanyana fɛɛ hin?
25 O to mu sni,
mu yiɛ juule juule tra.
26 Kena yiri mu pan mu ya o na,
mu koroo kre le mu pan mu o shɔ.