HLƐ SHIIN WO
(Mɛɛ Hlɛ 42–72)
Mɛɛ ŋga Korah bibilɛ na kɔ.
42
Imi na kafaa kilana nyumu chaa kre,
pan ni nyiɛ kila
na ŋu Nyiɛkpɔɔ haa chaa.
2 Nyiɛkpɔɔ, ŋmaafɛɛnlɛ Nyiɛkpɔɔ,
mu la ni ta.
Ŋgi ble mbe sɛ yire
Nyiɛkpɔɔ yiɛ hin?
3 Nyɛni ni nyɛni lafo na blee,
ki tia ni yotunyi kaari
ni pan sro,
nyjila kro nu, ni loŋgoolo ni wie na,
“Sena mu Nyiɛkpɔɔ wre nyi wo?”
4 Na ni fa sɔɔnri,
mbe fooro ni yii kpɔɔ.
Ni sɔɔnri na,
mi na Nyiɛkpɔɔ leele
tataara chaa,
mu nyaari mu sɛ u katoo,
na ble kpɔɔ lii, na mɛɛ koni,
na gble leni na u kaan mɛɛ.
5 Mni a ni yiɛ je,
a ndaa kala nyaa ma ŋga hin?
Mbe yiɛ taa Nyiɛkpɔɔ na,
ni ŋmaashɔfun Nyiɛkpɔɔ wre,
mbe u ŋga mɛɛ.
6 Ni yiɛ je, ki tia ni mu sɔɔnri,
Jordan lɔɔ na Hermon nyua,
na Mizar nyuɛ yire lawee nu.
7 Fooro wɛ ni na,
mu ni tɔ na shie na paan,
imi na epo mbapilɛ waa
na shie na paan kre.
8 Nyiŋge ki se nyaanyaa,
mbe o Tafun Nyiɛkpɔɔ
u koroo wɔ mbe ni nyina.
Na blee waa wɔ,
mbe ni mɛɛ kɔ mbe u ŋga,
mbe ni ŋmaashɔfun
Nyiɛkpɔɔ wre tali.
9 Mbe ni lefun Nyiɛkpɔɔ
wre wie na,
“Mni a mu ni fɛɛ ma hin?”
Mni a ni kro na kala nyaa,
ni loŋgoolo kɛɛ ma hin?
10 Faŋga ka n wa ni kajle nu na,
ŋgi na hin?
Ni loŋgoolo kro mu na ni wie, mbo,
“Sena mu Nyiɛkpɔɔ wre nyi hin?”
11 Mni a ni kro na fooro lii ma hin?
Mni a ni kro na jiin ma hin?
Mbe niyɛ wru
mbe taa Nyiɛkpɔɔ na.
U pe ni yafun na ni Nyiɛkpɔɔ.
Ki tia mbe u ŋga mɛɛ.