Mɛɛ Nyiɛtalaa
40
Ni frɔ,na o Tafun Nyiɛkpɔɔ sri,
mbe u paan ya ni na.
Wra ndie tɛɛ ni pan,
mna ni nyɛnɛɛ loo.
2 U ni wɔ mu yili
wee sisaa, na frɛrɛ nu,
mu ni yire dnɛ na,
a ni yire gbiŋmbi.
3 U ni nyina mɛɛ fɔŋgɔ,
mɛɛ ŋga ni mbe u mɛɛ yile.
Lenɛɛrɛ we nya mbe fiɛ,
mbe peyɛ wru mbe taa
o Tafun Nyiɛkpɔɔ na.
4 Ŋmba we uyɛ wru mbe taa
o Tafun wre na,
a wa uyɛ wru mbe taa
yɛkpɔɔmufɛɛnlɛ na,
ndee mbe sɛ taa sɛɛnlɛ kro kre,
u wo yi dwamu.
5 O Tafun Nyiɛkpɔɔ,
mu kawako kee tataara pe
mu o ŋga,
yi nɛɛ mu tro a yia jaa tɔɔnri,
ki tia o n ndro nya na ŋu wi,
waa jaa nyjɛ mu pe
yire sɔɔnri kro,
mbe yi kee bɔ.
6 Mu n na yira kɛ wo,
ndee srawɔɔ chaa,
a mu n na yurɛ mblɛ pie gbo,
mbe pe sro sragbunu na,
mbe mu ŋga pre chaa.
A mu n na srawɔɔ,
ŋga ki sisam laari
ndro na kre chaa.
Ki tia mu ni ŋga ndie,
na ni loo mu pan.
7 Ki tia ndaa yo na, “Mi wi kre,
a kee ŋga mu chaa
mbe ni loo kre,
pe ki nyunɔ mu tɛɛ
Moses Mbra hlɛ kre nu.
8 A ŋga ni chaa yi na
mbe ŋga ŋu ni Tafun chaa pe.
Mbe mu kee nyjɛ mu ni nyina
yire kro le ni jawala nu.”
9 O Tafun Nyiɛkpɔɔ,
ni yire mu leele fnindoo,
mu yo pe pan na mna o shɔ.
Ŋu titi chin na ni nyu wa tɔ
ki yoo na.
10 Ŋmaashɔmu kee ŋga ni loo kre,
ni n ki ti mi nunu ndra.
Nyjila kro nu ni mu kpra
na mu chichie,
ŋga mu pini kre kee kpali.
A mna mu leele we fni kpan,
mba nyu tɔ mu koroo
na mu kpra kee kre na.
11 O Tafun Nyiɛkpɔɔ,
ni chin na ni fooroo wa mu na
nyjila kro nu,
mu koroo na mu kpra
we kɛ tɔ ni na blenyini.
12 Kanyana tataara ni fɛ mu kun,
hali yia jaa tɔɔnri,
yi tia hali ni n na nyaa,
yi nɛɛ mu wɛ ni ndra nyjure na,
ki tia ni gbeŋmbaa kro kɔ.
13 O Tafun Nyiɛkpɔɔ ni shɔ,
jande pe nyaanyaa mu ni shɔ.
14 Mblɛ pe ni chaa mbe kla kre,
ti mbe nyifɛɛrɛ pe gbo.
Ti mbe mblɛ pe ni chaa
sisaa ni kre, ndru pe kro.
15 Ti mbe mblɛ pe ni pini na tɛɛ
pre kro to, mbe nyifɛɛrɛ pe gbo.
16 Ti mblɛ pe mu haa chaa pre,
yɛshɔɔrɔ li,
mbe pe yiɛshɔ mu na.
A mblɛ pe mu ŋmaashɔmu kolo
kori kre,
mbe praa mu kpɔɔmu kee yuu.
17 Mi rɛ, ni kee fooro ni,
a shianfun wi mi,
o Tafun Nyiɛkpɔɔ,
jande ni kee jawa.
Ni Nyiɛkpɔɔ, ŋu wi ni yafun
na ni shɔfun.
Jande, pe nyaanyaa mu ya ni na.