Mɛɛ ŋga David na kɔ mu Jeduthun ŋga.
39
Ni ki yo na mbe keenyjɛ ni pini le chichie,
mbe mba nyu nyaa mbe sisaa yo.
Mbe krafi tɛɛ mbe ni nyu yii,
ŋga sisampefɛɛnlɛɛ
wa ni jaara ŋga.
2 Ndaa pieri komm,
ni nsra nyu kun,
hali na pe kee chiriri yuu kuraa
mba ka yo.
Ande ni kanyana na nɛɛ mu wɛ.
3 Ni gbun naa ni fiiri, na ni jawa,
mbe lɛɛ na ni bri mbra ni yaa.
A ndaa nyu nyaa
mna paara mu yo na,
4 “O Tafun Nyiɛkpɔɔ,
ti mbe ni ni taahaa, na ni ble,
nyjɛ mbe li tra mna chin.
Jande ti mbe ni ble hɛnyi
nyjɛ mbe li tra mna nyu chin.”
5 Mu ka kun ni ble na mu yi pe fiɛn,
a ni yɛlɛ nyjɛ mbe li,
yi n pe yaka yira mu pan.
A imi na lewo nyi kpan,
pan u nyi na fuflɛ yi mu yiɛ.
6 Pan mu u le to na yira ndile yi.
Ŋga o pini kro,
kee waara yi mu pan.
U yirɛ cha mu tɛɛ
a u n chin ŋmba kɛɛ yie kɔɔ to.
7 Kena ŋmbi na mbe kaan na hin?
Na ŋu bɔkɔ wa n wa na.
8 Jande ni shɔ
mu yili ni sisam kro nu,
maa ti mbe jijiele na ni pali
mbra nyina.
9 O Tafun ŋgi mbe yo na hin?
Ni n na nyu ka kuun.
Ŋu mu ni pe imi
a ndaa kala nyaa.
10 Jande maa ni ndie tini ma na,
mu kɛ ŋga ni mu ni gbuun
kre tia ni chaa ku.
11 Na o sisaa pe,
mu o yiɛ kee yuu o pan, mbe tɛɛ
mbe o ndie tini, mbe o yirɛ kla,
imi na dumblɔ yira klai kre.
Kpra na,
pan lewo nyi na fuflɛ yi.
12 O Tafun Nyiɛkpɔɔ, ni talaa loo.
Na ni nyɛni, jande loo ni pan.
Na yotunyi ni fuu, jande,
mbe mu paan ya ni na.
Mu fuŋu wi mi,
imi na ni tolɛɛlɛ na nyi kre.
13 Yiɛ wɔ ni na,
mbe ni jaa yɛshɔɔrɔ ta,
mbe chiin yili tnimu ŋga nu,
mbe lewo wa ni nya na.