Talaa mɛɛ ŋga David na kɔ.
38
Ni Tafun Nyiɛkpɔɔmaa shia krɔ tɛɛ
mbe ni ndie tini.
2 Mu snimi ni suulo mu kro ni nu,
a mu ni fɔɔri mu wa tra.
3 Mu krɔkuɔn ndra na,
faŋga ka n wa ni nu na.
Ni sisam ndra na,
faŋga n wa ni kajle nu na.
4 Ni sisam wɛ ni na,
mu kaari ni pan tuuro
nyjɛ mba ja.
5 Ni jijiere sisam ndra na,
ni klɛ fɔɔn na ndio.
6 Fuŋgaami ŋga ni kuari mu sni,
na ni yiri, nyɛnɛɛ yi chiin
mbe yila paan kɔ.
7 Ni kukrɔ ŋga kro wɛɛri na ni yaa,
a gbugbam ka n wa ni nu na.
8 Ni faŋga kro kɔ ni nu,
a ki tia ni lɛɛ kla, a ndaa jiin.
9 O Tafun Nyiɛkpɔɔ,
ŋga ni chaa kro mu ki chin,
a mu ni jiɛn loo.
10 Ni loloŋgo seeri ni lɛɛ,
a ni faŋga na koo ni nu,
a ni nyiɛlɛ n na nyaa na chiriri.
11 Ni tnifɛɛnlɛ na ni nɔɔlɔ kro
fɛ mu laa ni na,
ni klɛ yire ndra na.
A ni sele leele fɛ mu laa ni na.
12 A mblɛ pe ni chaa sisaa ni pre
na ni peerii pɛɛlɛɛ,
mu na ni dɔɔyaa kee yuu.
Ni sisaa pe jawa nyjila kro nu.
13 A mi rɛ, pan ni nyi na kpo
ŋmba u n na ndru,
ndee ndro ŋmba nyu ki tɔ,
a wa jaa paara wi.
14 Pan ni nyi na lewo ŋmba wra loo,
ndee mbe jaa paara
mbe uyɛ shɔ wi.
15 O Tafun Nyiɛkpɔɔ ŋu na ni kaan,
ŋu o Tafun Nyiɛkpɔɔ,
ŋu mu loo ni pan.
16 Maa ti mbe ni loŋgoolo
yiɛshɔ ni na,
na ni mbulɔ mu to
mbe pia ni taa tɛɛ.
17 Ni chaa to, a ni fnaa wa ni yiɛ
nyjila kro nu.
18 Ni ni sisam yo mu pan,
ni hakɛ ndra na fooro ni yii.
19 Faŋgafɛɛnlɛ na jaŋgafɛɛnlɛ
biribiri pe ni pra.
Mblɛ na ni n yaka pe,
a pe je mu ni pra pe nɛɛ.
20 Mblɛ pe sisam tɛɛ
na chichie fɔlɔ toni pre
yiri mu ni taan,
ŋga ni fraka kre ndra na.
21 O Tafun Nyiɛkpɔɔ maa ni wa,
a maa ti mi na ŋu haa le.
22 O Tafun Nyiɛkpɔɔ,
na ni ŋmaashɔfun,
jande ya ni na.