David mɛɛ ŋga wra kɔ.
37
Yaa ti sisampefɛɛnlɛsisam pee e tɔɔra,
ndee mbe pe kepele pe e pan
niŋge ni.
2 Ŋgi na hin? Pan pe nyi na nyaa yi,
kia mu na pe shɔ,
kia mu na pe pe na wrɛ nyiŋge
ŋga pe chieri mu wa yila na yi.
3 E dankna ta o Tafun Nyiɛkpɔɔ nu,
e na chichie pini.
E tni tra ŋga na mbe e yiɛ shɔ.
4 E ti mbe e yiɛshɔ o Tafun wre na,
we e ŋga yira ŋga e lolonyi chaa.
5 E e kee kro wru e le
o Tafun Nyiɛkpɔɔ wre kɛɛ,
e eyɛ wru e taa u na,
we ŋga ki fna pe mbe e ŋga.
6 We ti mbe pe e frakaa nya
na nyisee yi.
7 E frɔ ta e o Tafun Nyiɛkpɔɔ shie,
mbe u ŋga we pe kre pe.
Yaa na mblɛ pe nyu pe tnimu nu,
ndee na tro kefuɛn kolo na
na nyɔɔ pre kee jawa.
8 Yaa ti mbe krɔ e kun,
a yaa eyɛ tɔɔra kee ka na.
Na kre ma,
kie kɔɔ sɛ na e ni sisam nu.
9 Mblɛ pe dankna
o Tafun Nyiɛkpɔɔ wre na kre,
pie tra kre ta mbe tni,
la, sisampefɛɛnlɛ rɛ,
we pe wɔ wa.
10 Ki kro chiɛri na
sisampefun n wa na.
Na pe u chaa u tnihaa kuraa,
pia u nya.
11 La, mblɛ pie peyɛ nyjii kre,
pie tra kre ta mbe tni,
mbe peyɛ ta,
mbe tni wejinyiŋge nu.
12 Sisampefun u chichie pefun jawa
kee sisaa ni, na nyu mɛɛri u na.
13 La, o Tafun Jaŋgafun wre
sisampefun tɛɛ. Ŋgi na hin?
U chin na kia mu mbe u u kla.
14 Sisampefɛɛnlɛ brɔfiɛn yiɛshiin
na snimi tini,
mbe shianfɛɛnlɛ
na mblɛ pe fraka pre gbo.
15 La, pre titi brɔfiɛnlɛ
we kna mbe pe gbo,
mbe pe snimi yire kuari.
16 Yira fiɛn ŋga kii wa lewo
ŋmba u fraka pan kre,
ki sna mu wɛ yirɛ nɛɛrɛ
nyjɛ yii wa
sisampefun pan yire na.
17 O Tafun Nyiɛkpɔɔ
we sisampefun wiyirɛ kuari,
mbe kɛ tɔ mblɛ pe fraka pre na.
18 O Tafun Nyiɛkpɔɔ
mblɛ pe fraka le,
a yira ŋga u le pe kɛɛ kre,
wa ki shɔ fio.
19 Kanyana nyjila nu,
pia fnaa chin,
a sro we bɔ pe na klo nyjila nu.
20 Kumuu wa na sisampefun siri,
Mblɛ pe o Tafun wre pra pre,
we kuun to na toto yi.
Pan pie fun na wree fun
nyiɛ yiɛ na.
21 Sisampefun, na u jin wra ki tɔ,
chichie pefun wre
lewo fooro chin na kee.
22 Mblɛ Nyiɛkpɔɔ dwan pre,
pie tra kre ta mbe tni.
La, mblɛ Nyiɛkpɔɔ sun kre,
we pe ni mbe yili wa.
23 O Tafun Nyiɛkpɔɔ u lewo nyina
kolo ŋga na we tro,
na kɛ toni mblɛ na u yiɛshɔ
pre na.
24 Na u gbro kuraa kre, wa wɔɔ to,
Ŋgi na hin?
O Tafun we u yii kɛ na.
25 Pɔ na wi mi, a fuŋga rɛ ni lɛ,
la, ni n da mu lewo
ŋmba u fraka nya,
a Nyiɛkpɔɔ kɛ laa u na tun,
ndee a u biile na tali na lii.
26 Nyjila kro nu, u leele kee,
na pe jini, a u biile dwamu taa.
27 Muyɛ wɔ sisam nu,
mna chichie pini,
kre mu tni tra kre nu
nyjila kro nu.
28 Ŋgi na hin? Kee ŋga ki fraka,
kre o Tafun Jaŋgafun wre kori.
A wraa yiɛ wɔ u leele na,
u pe le nyjila kro nu.
La, sisampefun kɛ leele rɛ,
we pe nɔɔ pɔ mbe flo wa.
29 Mblɛ pe fraka kre,
we tni tra ŋga na nyjila kro nu.
30 Lewo ŋmba u fraka kre,
u nyu kachindɛ kee yuu,
a u kpra kuun ki kolo na.
31 Nyiɛkpɔɔ mbraa wa
u loloŋgo nu,
a wa laa ki kro fio.
32 Sisampefun lewo frakafun
kooloe chaa, mbe u gbo.
33 La, O Tafun Nyiɛkpɔɔ
wa ti u to u loŋgo kɛɛ.
A na pe u kala li kuraa
wa ti u pimi li.
34 Ta kaan o Tafun Nyiɛkpɔɔ na,
mu li u nyu kee na,
we mu kpɔɔ
mbe mu tra kre taa tni,
a mu nya imi na
we sisampefɛɛnlɛ pe.
35 Ni sisampefun nya a u jaŋga ta,
mu pe kama na tiŋge
ŋga ki yire tra taan nu yi.
36 La, ki nsra mu,
a ndaa u cha mu la.
Ni nsra u nya na.
37 Lewo ŋmba u fraka
mu nyu Nyiɛkpɔɔ yiɛ na kre,
wre na u nanae kro
we wejinyiŋge ta.
38 La, sisampefɛɛnlɛ pre rɛ,
Nyiɛkpɔɔ we pe kla poŋgo,
mbe pe nɔɔ fun.
39 Lewo ŋmba u fraka wre,
o Tafun Nyiɛkpɔɔ yaa u na.
Na kala pan, wre u u shio.
40 O Tafun Jaŋgafun wre yaa u na,
na u woni na yilii
sisampefɛɛnlɛ kɛɛ,
na u kaan ŋmaa.
Ŋgi na hin?
Wre jaara u feni na shie.