O Tafun Nyiɛkpɔɔ sumifun David mɛɛ ŋga wra kɔ.
36
Sisampefun sisam paara u lɛɛ.U Nyiɛkpɔɔ je,
a Nyiɛkpɔɔ fiɛrɛ ka n wa u yiɛ na.
2 Wre titi jawala nu u uyɛ kpɔɔri,
u jawa na Nyiɛkpɔɔ
wa u sisam nya,
mbe u gbun pimi ni.
3 Sisam na kafinɛ kee
yi yilii u nyuu.
U n na chichie,
ndee kachindɛ kee ka jawa.
4 Na uu wa dɛŋglɛ na kuraa,
sisam u jawa,
kolo ŋga ki n nyu na u troi,
a wa sisam pee je.
5 O Tafun Nyiɛkpɔɔ,
mu koroo kpɔɔ mu sɛ su nyjeeri,
mu kpraa wa lawee kro nu,
hali mu sɛ su nyiɛ na.
6 Mu frakaa pe na nyua kpɔɔ yi,
a mu kpra lie juo na epo jijuom yi.
O Tafun Nyiɛkpɔɔ,
ŋu mu yurɛ na leele kro le.
7 O Tafun Nyiɛkpɔɔ,
mu koroo kpɔɔ mu tro,
a leweele nyimi ta mu jaara.
8 Sro ŋga o ta mu pan kre o yɔɔ,
mu tia o na gboo
mu lɔɔ chichie kre nu.
9 Ŋu mu ŋmaa kaan,
mu nyisee ki tia o na nyaa.
10 Mblɛ pe mu chin pre
kori mu ya,
mblɛ pe fraka pre,
ta pe pini chichie.
11 Maa ti mbe yɛkpɔɔmufɛɛnlɛ ni ta,
ndee mbe ni fɛ sisampefɛɛnlɛ yiɛ.
12 Sisampefɛɛnlɛ to na gbila,
pe to mu sni, a pia jaa yiri.