David mɛɛ ŋga wra kɔ.
35
O Tafun Nyiɛkpɔɔ,mblɛ pe n na ni chaa,
na wii na ni ni pre,
ŋu na pre e wi.
2 Mu ŋunɔ wiyirɛ wru
mu pan mu wi mu ni shɔ.
3 Mblɛ pe ni kɔŋgɔ nini kre,
mu chombo tini mu pe tɔ kolo,
mu yo ni nyiɛ pan na,
“Mu ŋmaashɔfun wi mi.”
4 Jande, ti mbe nyifɛɛrɛ
mblɛ pe ni chaa sisaa ni
pre gbo kpɔɔ,
mbe mblɛ pe jina tuuri
mbe ni kla kre,
mbe tutom wo pe na
mbe pe ndru mbe sɛ.
5 Ti mbe pe pe na yirɛ fue yi
fuflɛ yiɛ,
mbe o Tafun Jaŋgafun wre
bituŋu pe ni, mbe pe sɛ yiɛ.
6 Ti mbe ndram wɔ kolo
ŋga pie yii kre na,
mbe ti ki pe plɔplɔ,
mbe o Tafun bituŋu na pe nini.
7 Ŋgi na hin?
Pe ni pɛɛri pɛɛlɛɛ finfin,
mu weele tuu na ni chaa mbe yii.
8 Pe klaa we pe fo,
mbe pre titi pɛɛlɛɛ
nyjɛ pe pɛɛri yire pe yii,
mbe pe to pe weele yire nu
mbe pia jaa yiri na.
9 O Tafun wre saara na,
ni yiɛ we shɔ na u ni shɔ.
10 Mbe ni loloŋgo kro tɛɛ,
mbe yo o Tafun wre pan na,
“Ndro wa n wa, na ŋu wi.”
Ŋu mu fɔɔnrɔfɛɛnlɛ shio
faŋgafɛɛnlɛ kɛɛ,
na shianfɛɛnlɛ shio,
mblɛ pe pe fiŋge kɛɛ.
11 Sisampefɛɛnlɛ dansiɛrɛ lii
na ni taanla,
na ni wie kee nyjɛ nu ni n chin.
12 Sisam pe teeri na ni chichie
nyjɛ ni pini fɔlɔ toni,
a fooro ni yii.
13 La, na pe yaa ki ni shian,
mbe ni kumu yoŋgo tɔ,
mbe tni lɛɛwaa, mba yaka le nyuu,
mbe yiɛ juule tra,
mbe nyiɛtali mbe pe ŋga.
14 Pan ni wrekroo lii na nyiɛtali,
na ni nunu ndee ni ndro
wa u yaa,
hali mbe ndra soo mbra nyɛni
na ni lo wi.
15 La, na ni kala ta kre,
mbe pe yiɛ shɔ,
mbe pe sɛ fni mbra ni piin mbra tɛɛ,
mbra ni mɛɛ klai nyjila kro nu.
16 Imi na pe yambla tɛɛ kre,
pan pe jiin na ni piin
na ŋgaala chirɛ ni na.
17 O Tafun Nyiɛkpɔɔ, mu pe le
mbe sɛ su nyjila ŋgi na hin?
Ni shɔ mu yili pe kɛɛ,
ni ŋmaa shɔ mu yili
pre jirae mblɛ kɛɛ.
18 O Tafun Nyiɛkpɔɔ,
mbe mu ŋga mboo lenɛɛrɛ fnihaa,
mbe mu mɛɛ yile mbe pe nya.
19 Maa ti mbe ni loŋgoolo,
kafinɛfɛɛnlɛ pre yiɛshɔ
na pe ni ja.
Maa ti mbe mblɛ pe ni pra finfin,
pre ni ta mbra tɛɛ.
20 Praa wejinyiŋge kee yo,
la, kala pe fnɛ na taari,
leele mblɛ pe nyjii pre na.
21 Pe nyu nyaari na yuu, mbo,
“Ɛnhɛɛn, o mu kepele nya.”
22 La, o Tafun Nyiɛkpɔɔ,
mu pe nya.
Maa shia pieri mbe pe ti.
Jande maa shia laa ni na
mbe sɛ haa lee.
23 O Tafun Nyiɛkpɔɔ,
yiri mu kɛ tɔ ni na.
Ni Tafun, yiri mu wi mu ni ŋga.
24 Ti mbe pe chin na ni fraka,
ŋu o Tafun Jaŋgafun wre yiɛ,
maa ti mbe ni loŋgoolo ni ta
mbe tɛɛ.
25 Maa ti mbe pe jawa mbe yo na,
imi o u chaa yi kre, o u ta aŋga.
26 Mblɛ yiɛ ki shɔ
ni kanyana na kre,
ti mbe pe nyu gbli peyɛ na
mbe nyifɛɛrɛ pe gbo.
Mblɛ pe yuu na pe wɛ ni na kre,
ti mbe nyifɛɛrɛ kpɔɔ pe gbo.
27 Ti mbe mblɛ pe chaa,
mbe ni tam li pre yiɛshɔ,
mbe pra yuu nyjila kro nu na,
“O Tafun Jaŋgafun wre kpɔɔ,
U yiɛ shɔ na u sumifun uyɛ ta.”
28 Ni nyu we mu kefrakaa yo,
mbe mu ŋga mɛɛ nyjila kro nu.