Mɛɛ ŋga David na kɔ, nyjila ŋga ni wra uyɛ pe na tɔɔlɔfun wi ŋunu Abimelech yiɛ, a wra u ni a wra sɛ.
34
Nyjila kro nu, mbe o TafunNyiɛkpɔɔ wre ŋga mboo.
Ni nyu wa tɔ u mɛɛ yeeree na.
2 Kee ŋga u pe ndra na,
mbe u ŋga mɛɛ.
Mblɛ pe peyɛ nyjii pre we ki loo,
mbe pe yiɛshɔ.
3 E ti mbe mi na yire
o Tafun wre kekpɔɛ
nyjɛ u pe yire yo,
e ti mbe o chaa mbe u mɛɛ yile.
4 Ni nyɛni
mu o Tafun Nyiɛkpɔɔ yeeri,
a u loo ni pan.
U ni shɔ mu yili
nyjɛ ni fiɛ kro nu.
5 Mblɛ praa kaan u na kre,
u nsra tia nyifɛɛrɛ na pe gbo.
6 Shianfɛɛnlɛ na nyɛni mu u yeeri,
a wra shɔ pe pan, mna pe shɔ
mu yili pe kanyana kro nu.
7 Mblɛ pe o Tafun wre fiɛ kre,
u bituŋu feni na pe kuun,
na pe shio pe kanyana kro nu.
8 O Tafun Jaŋgafun wre pe mu le,
kre mu chin na u tna.
Mblɛ pe peyɛ wru mu u ŋga
pre wo yi dwamu.
9 Yire Nyiɛkpɔɔ leele,
e u ŋga buuro.
Mblɛ pe u kaan buuro kre,
yaka wa pe shian.
10 Jira kila mbe sro chaa la lihaa,
la, mblɛ pe pe Tafun haa chaa kre,
yaka chiriri wa pe shian fio.
11 Ni biile, e pan, e ndie tɛɛ ni pan,
mbe e nyina kolo ŋga na ee tro,
mbe o Tafun wre ŋga buuro.
12 E ŋmbi haa u ŋmaa chaa hin?
Ŋmbi u ŋmatitnɔmu,
na yɛshɔɔrɔ chaa hin?
13 Kena u fun u u nyu yii,
sisam na kafinɛ kee yoo nu.
14 Muyɛ wɔ mu yili sisaa pee nu,
mna chichie pini,
mu wejinyiŋge haa cha.
15 O Tafun Nyiɛkpɔɔ yiɛɛ wa
mblɛ pe fraka na,
a u pe nyɛnɛɛ ndru.
16 O Tafun Nyiɛkpɔɔ wii
na sisampefɛɛnlɛ ni,
a we pe kla
mbe pe nɔɔ fun tra ŋga na.
17 La, mblɛ pe fraka pre,
na pe nyɛni u ndru pe pan,
a u pe woni keshian kro nu.
18 Mblɛ pe fooro lii kre,
o Tafun wre mbra pe na,
a mblɛ dankna ki kɔ kre u pe shio.
19 Lewo ŋmba u fraka
wre kanyana we nɛɛ,
la, o Tafun Nyiɛkpɔɔ Jaŋgafun wre,
we u shɔ mbe yili yi kro nu.
20 We na u le kolo kro na,
hali u kajle nunu chom kuraa
wa ka.
21 Sisam we sisaapefun gbo,
a ŋmba u lewo
ŋmba u fraka pra kre,
Nyiɛkpɔɔ we u ndie tini.
22 O Tafun Nyiɛkpɔɔ Jaŋgafun wre
we u leele shɔ,
a mblɛ pe feni na shie u pan kre,
wa pe gbun pimi ni.