Yɛshɔɔrɔ Mɛɛ
33
Yire mblɛ e fraka kre,e ŋga Nyiɛkpɔɔ pe le,
e ti mbe e yiɛshɔ u na.
E kro fna mbe u ŋga mɛɛ.
2 E juru tɛɛ e mɛɛ kɔ,
e o Tafun wre ŋga mboo.
E juru ŋga mɛnyi yii kɛ tɛɛ,
e mɛɛ kɔ e u ŋga.
3 E mɛɛ fɔŋgɔ kɔ e u ŋga.
E juru kre gbun chiriri,
e na yɛshɔɔrɔ gblee leni.
4 Ŋgi na hin? Nyiɛkpɔɔ kee fraka,
a u tnumu ŋga u tuni kro,
u ki tuni kpra ni.
5 U kee ŋga nu kpra nyi,
mu fraka kori.
A u yira ŋga kii wa tra ŋga nu
kro kori.
6 O Tafun Nyiɛkpɔɔ wre,
u nyu kee ni u tɛɛ mu nyjeeri wa,
mu yirɛ nyjɛ yii wa kro gbeele.
7 Mu epo nyumu kro ble titɛɛ,
mu ki le yira nunu nu mu tɛɛ,
8 Leele mblɛ pee wa tra na kro fna,
mbe o Tafun Nyiɛkpɔɔ wre fiɛ.
Leele mblɛ pee wa
waŋgra ŋga nu kro fna,
mbe u nyifɛɛrɛ pe.
9 Wre wra u nyu kee tɛɛ
mu waŋgra ŋga gbeele,
mna paara a yirɛ kro na pan.
10 Wre u tia leele
mblɛ pe n u chin pre,
kee na pini waara,
mu tia pe jawala kee
na pini finfin.
11 La, ŋga o Tafun Nyiɛkpɔɔ yo
mu tɛɛ kre,
kii wa wa nyjila kro nu.
A ŋga u jawa mu tɛɛ kre,
ki n wa na nyukɔɔrɔ ni.
12 Waŋgra ŋga ki Nyiɛkpɔɔ pe
ki Tafun kre wo yi dwamu.
Kre leele pre u woni
na pe kaan dwamu.
13 O Tafun Nyiɛkpɔɔ
wree wa nyjeeri wa,
na ndro kro nyaa tra mna.
14 Uu wa u tnihaa wa,
na ndro kro le tra mna.
15 Wre u lewo kro loloŋgo gbeele,
ki tia u kee ŋga lewo piin
kro chin.
16 Ŋunɔwifɛɛnlɛ faŋga ma
ki pe shio ŋunɔ,
a pe nɛɛmu ma
kie pe ŋunu shɔ ŋunɔ.
17 Ŋunɔ wi soo
wa jaa ndro shɔ ŋunɔ,
a pia jaa pe faŋga tɛɛ
mbe ndro shɔ.
18 O Tafun Nyiɛkpɔɔ yiɛɛ wa
mblɛ pe u fiɛ, mu na kaan
u blenyini koroo kre na.
19 We pe shɔ kumu kɛɛ,
mbe pe ŋga ŋmaa klo nyjila.
20 O Tafun Jaŋgafun Nyiɛkpɔɔ,
wre nu o dankna kro nyi,
wre wi o lefun na o yafun.
21 U saara na o yiɛshɔ. Ŋgi na hin?
O oyɛ wru mu taa
u mɛɛ cheche kre na.
22 O Tafun Nyiɛkpɔɔ, jande,
ŋga o kaan mu na ŋga,
ti mbe mu koroo kre tni
na o ni.