David mɛɛ ŋga wra kɔ.
32
Leele mblɛ sisam na pe hakɛNyiɛkpɔɔ ti mu kɛ kre,
pe wo yi dwamu.
2 Ndro ŋmba wa kala fnɛ,
a o Tafun Nyiɛkpɔɔ
wre wa sisaa ka nya u na,
mbe yire ki na mbe u gbun
pimi ni wre wo yi dwamu.
3 Ŋga ndaa tɔ ni sisam na kre,
blenyini nyɛnɛɛ na tia
faŋga na kɔ ni kajle nu.
4 O Tafun, mu ni ndie tinii
lafo na blee,
a faŋga ka n wa ni nu na.
Pan ni nyi na tla yila ki ni gbuun.
5 Ki tia ndaa nyu nyaa
mu ni sisam yo mu pan,
a ni n ni sisam ka ndra,
ndaa yi kro yo mu pan,
a mna ni sisam kro ti mu ni kɛ.
6 Ki tia mu leele mblɛ pe fraka pre,
na pe yaka shian, pie mu tali.
Hali na lɔɔ nyi na paan,
kia da pe na.
7 Ŋu wi ni ndrahaa,
a ŋu mu ni shio kanyana nu.
Mbe mɛɛ kɔ kpɔɔ mbe mu ŋga.
Ŋgi na hin?
Ŋu mu kɛ toni ni na, na ni shio.
8 O Tafun Nyiɛkpɔɔ yo mbo,
“Mbe mu jawala nyaa,
mbe mu nyina kolo ŋga na mu tro.
Ni yiɛɛ wa mu na,
a mbe mu ŋga jawala.
9 Maa daŋga na soo, ndee bubnɔ wi,
wre u n na kala nɔɔ ndru,
fɔna pe krafi, ndee maŋa le u na.”
10 Sisampefɛɛnlɛ we kala nya kpɔɔ,
la, mblɛ pe kaan,
o Tafun Nyiɛkpɔɔ wre na pre,
we yire u koroo kre na,
mbe kɛ tɔ pe na.
11 Yire mblɛ e fraka kre,
e ti mbe e yiɛ shɔ,
kee ŋga o Tafun Nyiɛkpɔɔ wre pe
mu e ŋga kre na.
Yire mblɛ e ndie teeri u kee na kro,
e ti mbe e yiɛshɔ kpɔɔ.