David mɛɛ ŋga wra kɔ.
31
O Tafun Nyiɛkpɔɔ, ŋu pan ni panmbe mu kɛ tɔ ni na.
Maa shia ti
mbe nyifɛɛrɛ ni gbo fio.
Ŋu wi Nyiɛkpɔɔ ŋmba mu fraka.
Jande ni shɔ.
2 Ndie tɛɛ ni pan,
mu pe nyaanyaa mu ni shɔ.
Ŋu wi ni fɛndrahaa, na ni lefun.
3 Ŋu mbe fɛ mbe sɛ kaari,
mbe mu ni shɔ, mbe ni yii,
mbe ni nyina mu kolo,
imi na mu yo kre.
4 Ni wɔ mu yili pɛɛlɛɛ
nyjɛ pe ni pɛɛri yire nu,
ŋgi na hin? Ŋu wi ni lefun kpɔɔ.
5 Ŋu kɛɛ ni ni ŋumu wru mu le,
Kprafun Nyiɛkpɔɔ, Ŋu mu ni shɔ.
6 Leele mblɛ pe taa sɛɛnlɛ wɛɛ kro
kre, mu pe fun.
Mi rɛ, mbe taa ŋu
o Tafun wre na.
7 Mbe ti mbe ni yɛshɔɔrɔ kpɔɔ,
ŋgi na hin? Mu koroo kpɔɔ.
A mu ni katala
na ni kanyana kro nya.
8 Mu n tia ni loŋgoolo ni ta mu yii,
a ni niyɛ ta mbe sɛ mna ni chaa.
9 O Tafun Nyiɛkpɔɔ Jaŋgafun,
ni fooro le,
ŋgi na hin? Ni kala nyaa.
Ni nyɛni mu fna,
a sra titi sɛ wɔ ni na.
10 Fooro na nyɛnɛɛ tia
ka kun ni ŋmaa na,
a ni sisam tia ni faŋga kɔ,
hali faŋga ka n wa ni kajle nu na.
11 Ni loŋgoolo na ni tnifɛɛnlɛ kro,
wa n ni le mu nya,
mblɛ pe ni chin titi pre ni fiɛ.
Na pe ni nya lete na kuraa
mbe praa feni.
12 Leele ni fɛɛ.
Pe jawa na kuu ni ku.
Pan ni sɛ pe na yira ŋga
pe wa kafuŋgo na yi.
13 Ni loo na lenɛɛrɛ
kefuɛn yuu ni na,
ki tia fiɛrɛ ni yii kpɔɔ.
Pe jina to ni ndra na,
na ni chaa mbe gbo.
14 La, ŋu o Tafun
Nyiɛkpɔɔ Jaŋgafun,
ŋu na ni niyɛ wru mu taa,
ni yo ŋu wi ni Nyiɛkpɔɔ.
15 Ŋu kɛɛ ni baŋga nyi,
ni shɔ mu yili ni loŋgoolo
mblɛ pe ni chaa mbe kla pre kɛɛ.
16 Yiɛ nyaa mu mu sumifun le,
mu u shɔ mu koroo kre na.
17 O Tafun, ni nyɛni mu mu yeeri.
Jande, maa ti mbe nyifɛɛrɛ ni gbo.
Ti mbe nyifɛɛrɛ
sisampefɛɛnlɛ pre gbo,
mbe pe nyu ku kuulo ndoo.
18 Ti mbe kafinɛfɛɛnlɛ kaari kpoolo,
Ŋgi na hin? Pe kewɛɛ yuu leele
mblɛ pe fraka na,
na peyɛ kpɔɔri kefuɛn
nyjɛ pe piin na.
19 Yirɛ nyjɛ mu tɛɛ leele
mblɛ pe mu fiɛ pan kre,
yi nyu mu tro.
A mblɛ pe feni na paan mu jaara kre,
mu pe shio.
20 Pe pan mu pan, a mu kɛ tɔ pe na,
leele pre sisam kee
nyjɛ pe jawa na.
Mu pe ndra, a ki tia
pe loŋgoolo n pe nya mu tɛɛlɛ.
21 Mbe o Tafun Nyiɛkpɔɔ
wre ŋga mboo. Ŋgi na hin?
Nyjila ŋga nu loŋgoolo ni tɔ
chia kre na kre,
u tia ni u kawako koroo kre nya.
22 Fiɛrɛ na tia ndaa sɛ pe na,
mu ni ni mu flo mu yiɛ,
a nde ŋga ndaa nyɛni
mu mu yeeri kre,
mna loo ni pan.
23 O Tafun Nyiɛkpɔɔ
leele kprafɛɛnlɛ pre, e u kori,
ŋgi na hin? Wre u kɛ toni
kprafɛɛnlɛ na.
La, mblɛ pe peyɛ kpɔɔri kre,
u pe ndie tinii imi na ki fna.
24 Yire mblɛ e dankna
o Tafun wre na kre,
e faŋga ta, e gbun ta.