Mɛɛ ŋga David na kɔ mna tɛɛ mu Suminyuŋgo nyu nyaa.
30
Ni Tafun Nyiɛkpɔɔ,mbe mu ŋga mboo.
Ŋgi na hin?
Mu ni shɔ ni loŋgoolo kɛɛ,
a mu n tia pe yɛshɔɔrɔ li
ni ndra na.
2 O Tafun Nyiɛkpɔɔ,
ndaa nyɛni mu mu yeeri,
mbe mu ya ni na,
a mna ki loo mu ni tra.
3 Mna ni shɔ mu yili kuulo ndoo,
mu n sra tia ndaa kro faŋga nu.
4 Yire mblɛ e fraka pre, e mɛɛ kɔ
e o Tafun Nyiɛkpɔɔ wre ŋga.
E ŋga u pe kre sɔɔnri,
e u ŋga mboo.
5 Na u krɔ kun, kraa mu,
la, u foorochiɛn,
kree wa nyjila kro nu.
Mu jaa nyɛni chiin blee,
la, na ndram saan,
mbe yɛshɔɔrɔ pan.
6 Mi rɛ, ni yɛtaara nu kre,
ni yo na mba fiɛ fio.
7 Ni Tafun Nyiɛkpɔɔ,
mna nyu ni na,
mu ni le mu tia
ni yire na nyua yi.
La, ki n da nyjila ka to,
a mu yiɛ wɔ ni na,
mu tia fiɛrɛ ni yii.
8 O Tafun Nyiɛkpɔɔ,
ŋu ni nyɛni na yeeri,
mbe mu ya ni na.
9 Yira ŋgi tnu mu ta
ni kumu nu hin?
Na pe ni le wee,
ŋgi mu ta ki nu hin?
Kuulo we mu ŋga mɛɛ ree?
Ndee pie kee chichie
ŋga mu pini kre kee yo wa ra?
10 O Tafun Nyiɛkpɔɔ,
loo ni pan, mu nyu ni na.
O Tafun Nyiɛkpɔɔ,
jande ya ni na.
11 Mu tia ni nyɛnɛɛ
kaari ni pan yɛshɔɔrɔ.
Mu ni wrekroo yoŋgo laa mu wa,
mu tia ni yɛshɔɔrɔ yoŋgo tɔ.
12 Kena mba ti mbe ni nyu tɔ,
mbe mɛɛ kɔ mbe mu ŋga,
ni Tafun nyiɛkpɔɔ,
ŋu wi ni Nyiɛkpɔɔ.
Kena mbe mu ŋga mɛɛ
nyjila kro nu.