David mɛɛ ŋga wra kɔ.
28
O Tafun Nyiɛkpɔɔ,ŋu wi ni lefun,
ŋu ni nyɛni na yeeri,
jande loo ni pan.
Na kre ma, na mu pieri mu ni ti,
mbe pe na lewo
ŋmba u ku a pe u le wi.
2 Na ni nyɛni mu mu yeeri,
mu kɛnyi yire mu nyini
mu Suminyuŋgo cheche kre na,
jande loo ni pan.
3 Maa shia mi na sisampefɛɛnlɛ
pre chaa mbe kla.
Pe kee nyjɛ yi tna ndie yuu,
la, sisam kii wa pe jawala nu.
4 Pe kepele na pe sisam
nyjɛ pe pini le,
mu pe ndie tini.
Pe kepele nyjɛ pe pini kro le,
mu pe ndie tini imi na ki fna.
5 Yirɛ nyjɛ o Tafun Nyiɛkpɔɔ
wre gbeele,
na kee nyjɛ u pe yire krɛrɛ,
pe n ka le mu nya.
Ki tia we pe ndie tini,
mbe pe dɔɔya kuraa.
6 O Tafun Nyiɛkpɔɔ wo yi mɛɛ,
Ŋgi na hin? U ni nyɛnɛɛ loo.
7 Nyiɛkpɔɔ kɛ tɔ ni na
mu ni le chiriri.
Mbe lɛɛ wɔ mbe taa mu kro.
Mu ya ni na, a ni yiɛshɔ.
Kena mbe mɛɛ kɔ
mbe mu ŋga mboo.
8 O Tafun Nyiɛkpɔɔ kɛ toni
u leele na,
a wre u u ŋunu ŋmba u wɔ
wre shio na kɛ toni u na.
9 O Tafun Nyiɛkpɔɔ, mu leele shɔ.
Mblɛ pe pe mu wolo pre dwan,
mu pe le mna yaa pe na,
nyjila kro nu.