David mɛɛ ŋga wra kɔ.
27
O Tafun Nyiɛkpɔɔ wre wini nyisee na ni ŋmaashɔfun,
ndro ŋmbi mbe fiɛ na hin?
O Tafun wre kɛɛ ni ŋmaa nyi
wra ni le,
ki tia ni gbun wa yɔ ni na.
2 Na sisampefɛɛnlɛ ni tɔ
na ni chaa mbe gbo kre,
pie mbulɔ mbe to.
3 Hali na waŋgra poŋgo fɛ
mu ni kun,
a loŋgoolo pan mu ni tɔ poŋgo,
mba fiɛ, a ni gbun wa yɔ.
4 Kee nunu ni tali
o Tafun Nyiɛkpɔɔ wre pan,
a kre haa ni chaa, na mbe tni
o Tafun Nyiɛkpɔɔ wre katoo,
ble nyjɛ mbe li kro nu,
mbra u kawako kee yire le,
mbe u wie mbe u ni nyina u kolo.
5 Ni katala nyjila,
wre we kɛ tɔ ni na,
mbe ni ndra u Suminyuŋgo,
ndee mbe sɛ ni taa
dnɛ gedeŋge ndra na.
6 A we ni yulɔ yile,
ni loŋgoolo mblɛ pe fɛ
mu ni kun kre nu.
Mbe yɛshɔɔrɔ tɛɛ
mbe sra wɔ u Suminyuŋgo,
mbe mɛɛ kɔ mbe u ŋga mɛɛ.
7 Ni Tafun Nyiɛkpɔɔ,
jande ni nyɛnɛɛ loo.
Ni fooro le mu shɔ ni pan.
8 Ni Tafun Nyiɛkpɔɔ,
mu yo na, ni paan mu sumi,
kena ni lɛɛ nunu tɛɛ na mu sumi.
9 Kena maa shia yiɛ wɔ ni na,
maa krɔ wru na ni ni,
ŋu wi ni yafun,
a mu sumifun wi mi,
maa ni wa ndee mbe kɛ laa ni na,
Ŋgi na hin?
Ŋu wi ni ŋmaashɔfun Nyiɛkpɔɔ.
10 Hali na ndoo na maa kɛ laa ni na,
o Tafun Nyiɛkpɔɔ, we ni shɔ.
11 O Tafun Nyiɛkpɔɔ
ni nyina mu kolo,
mu tro na ni ni mu kofrakaa na,
ŋgi na hin? Ni loŋgoolo nɛɛ.
12 Maa ni wru mbe le
ni loŋgoolo kɛɛ. Ŋgi na hin?
Kala pe fnɛ na taari ni na,
na ni piɛri.
13 Ni shɔ mu li na mbe ŋmaa li,
mbe o Tafun Nyiɛkpɔɔ
chichie nya,
ŋmaafɛɛnlɛ tra ŋga nu.
14 O Tafun Nyiɛkpɔɔ wre shɔnli.
Gbun ta mu shɔnlie ta,
mna kaan u na.