David mɛɛ ŋga wra kɔ.
25
O Tafun Nyiɛkpɔɔ,ŋu kɛɛ ni ni nyiɛ wru mu le.
2 Ni Nyiɛkpɔɔ,
ŋu na ni niyɛ wru mu taa.
Jande maashia ti
mbe nyifɛɛrɛ ni gbo,
a maa shia ti
mbe ni loŋgoolo ni ja.
3 Yɛŋgɛ na, mblɛ pe mu kolo,
wru kre nyifɛɛrɛ wa pe gbo fio.
La, mblɛ pe denyjuu lii kre,
pre nyifɛɛrɛ we gbo.
4 O Tafun Nyiɛkpɔɔ,
ni nyina mu kolo.
Tro na ni ni mu kofrakaa na.
5 Ni nyina mbe ni jaa tro
mu kpra kolo kre na.
Ŋgi na hin?
Ŋu wi ni ŋmaashɔfun Nyiɛkpɔɔ,
a ŋu na ni yiɛ nyi nyjila kro nu.
6 O Tafun, mu fooro chiɛn
na mu koroo kre sɔɔnri.
Ŋgi na hin? Fafa yi yiri.
7 Maa ni bimi sisam,
na ni punɔɔ sɔɔnri.
O Tafun ni sɔɔnri,
mu foorochiɛn,
na mu koroo kre ndra na.
8 O Tafun Nyiɛkpɔɔ wre nyu
mu fraka,
kre ki tia wra sisampefɛɛnlɛ
nyina u kolo.
9 U tia mblɛ pe peyɛ nyjii pre fraka,
na pe nyina u kolo.
10 Mblɛ pe lii o Tafun mbra kee na,
na lii u dansiɛrɛ kee na kre,
u kolo kro pe dumiɛn,
na kpra kee mu pe ŋga.
11 O Tafun Nyiɛkpɔɔ,
li mu nyu kee na,
mu ni sisam ti mu ni kɛ.
Ŋgi na hin? ni sisam nɛɛ.
12 Lewo ŋmba u Nyiɛkpɔɔ fiɛ kpan,
Nyiɛkpɔɔ we u nyina kolo
ŋga na ki fna u tro,
13 a u nyiɛ we yirɛ chichiele ta,
mbe u biile tra kre taa tni.
14 O Tafun Nyiɛkpɔɔ
u ndra kee woni,
na mblɛ pe u fiɛ pre nyina,
mu tia pra u nyu nunu kee,
ŋga u yo mu tɛɛ kre lam nyaa.
15 O Tafun Nyiɛkpɔɔ yiɛ
ni le nyjila kro nu,
wre we ni jele wɔ
mbe yili pɛlɛ nu.
16 Yiɛ kna mu ni le, mu ni fooro le.
Ŋgi na hin? Mi nunu wi,
a ni kee fooro ni.
17 Ni kanyana kpɔɔ.
Ni wɔ mu yili kee
nyjɛ yi ni pɔ yire nu.
18 Ni kanyana na ni fnaa le,
mu ni sisam kro ti mu ni kɛ.
19 Le imi na ni loŋgoolo nɛɛ mu da,
pe ndra shelee tɛɛ mu ni pra.
20 Kɛ tɔ ni na, mu ni shɔ,
maa ti mbe pe ni ja,
Ŋgi na hin? Ŋu jaara ni fɛ mu pan,
mbe mu ni shɔ,
21 Ti mbe chichie na frakaa ni le,
ŋgi na hin? Ŋu na ni yiɛ nyi.
22 Nyiɛkpɔɔ, Israel leele shɔ
pe kanyana kro nu.