David mɛɛ ŋga wra kɔ.
22
Ni Nyiɛkpɔɔ, ni Nyiɛkpɔɔ,mni a mu laa ni kro hin?
Ni nyɛni mu mu yeeri,
a mu n shɔ ni pan.
2 Ni Nyiɛkpɔɔ, ni nyɛni,
mu mu yeeri lafo na,
a mu n shɔ ni pan,
a ni mu yeeri blee, pan yi na,
ki tia ni n wejinyiŋge ni.
3 La, ŋu mu pe cheche,
a muu wa mu tni mu ŋujɔɔn na,
a Israel leele na mu kaan mɛɛ.
4 Ŋu na o tolɛɛlɛ pre yiɛ na nyi,
pe yiɛ naa wa mu na,
a mna pe shɔ.
5 Pra nyɛni mu mu yeeri,
a mna pe shɔ. Ŋu na praa kaan,
a mu nsra tia nyifɛɛrɛ na pe gbo.
6 La, lewo ma mi na,
pan ni sɛ pe na dɔŋgɔ wi,
ndro n ni le mu nya,
ndro kro ni le fiɛn.
7 Mblɛ pe ni nya kro ni pini na tɛɛ,
mu nyu nyaa mu wa na ni le,
na ndra nyaara na yuu na,
8 “O Tafun Nyiɛkpɔɔ wre
na u uyɛ wru mu taa.
U ti mbe O Tafun paan u shɔ,
na u chaa u paan u shɔ mbe o le.”
9 A ŋu mu ni wɔ ni lo lɛɛ,
nyjila ŋga ni ndaa wa,
na ŋgoorii kre kuraa,
mna tia ndaa kaan mu na.
10 Ŋga ndaa yili ni lo lɛɛ,
mu to tra kre,
ndaa niyɛ wru mu taa mu na.
Nyjila ŋga ni ndaa wa,
ni lo lɛɛ kuraa kre,
na ŋu wi ni Nyiɛkpɔɔ.
11 Kena maa ti
mbe mu haale na ni ni,
mi na kanyana mbra,
a ndro n wa mbe ya ni na.
12 Ni loŋgoolo pe na nabilɛ lɛ
mu fɛ mu ni kun,
pe kpɔɔ kpɔɔ na Bashan nabilɛ lɛ
mu ni kun mu le lalaa.
13 Pe nyu nyaa ni na,
na jirae mblɛ klo ta,
a pra jlo na sro chaa lɛ.
14 Pe ni kna mu wo na nyumu yi,
a ni sooloe kro pe yiɛyiɛ,
a ni loloŋgo nya ni lam,
na srɛ kanya yi.
15 Ni faŋga kɔ ni nu na chɔ jaa yi,
mba jaa yaka pe,
a ni ndile mbra ni nyu lam,
a mu tia ni ku bloŋgo nu.
16 Leele sisaala peyɛ nya,
mu pan mu ni fɛ mu kun,
pe pe na nyikaanla lɛ
mbe paan ni tɔ,
mbe paan ni yii, ni kɛnyi,
na ni jeelee na mbe ni wla.
17 Ni kro kajle bri,
na ni loŋgoolo ni nya,
mbe praa nyu mɛɛri ni na.
18 Pe kɛɛn tɛɛ,
mu ni dodoŋgi fimi wo,
yɔɔlɛ mu peyɛ ŋga,
mu kɛɛn tɛɛ, mu chin
ŋmba wi ni dodoŋgi lam-wo ta.
19 La, ŋu o Tafun Nyiɛkpɔɔ,
maa ti mbe mu haale na ni ni,
ni yafun, pe nyaanyaa
mu pan mu ni shɔ.
20 Ni shɔ mu yili
brɔfiɛn yiɛshiin kɛɛ,
ni shɔ nyikaanla mblɛ kɛɛ.
21 Ni ŋmaa shɔ mu yili jirae
mblɛ nyuu,
ni shɔ mu yili nyaalam nuulo
mblɛ kɛɛ.
22 Mbe mu mɛɛ yeeri,
mbe ni wolo pre nyina,
a mbe mu ŋga mɛɛ,
mu sumifɛɛnlɛ fnindoo.
23 Yire mblɛ e Nyiɛkpɔɔ fiɛ kre,
e u ŋga mɛɛ.
Jacob nanae pre kro,
e u ŋga yɛnyiŋge,
Israel nanae pre kro,
e u sumi.
24 Mblɛ pe kala nyaa kre,
u n pe je, a u n pe kanyana fɛɛ.
Pe nyɛni mu u yeeri,
a u ki loo.
25 Nyiɛkpɔɔ, ŋu mu ti
mbe ni mu ŋga mɛɛ,
mu sumifɛɛnlɛ tataara nu,
a mblɛ pe mu fiɛ pre yiɛ na,
mbe yirɛ nyjɛ ni da na,
mbe mu ŋga yire wɔ.
26 Mblɛ pe kala nyaa pre we lii yɔɔ,
a mblɛ pe o Tafun Nyiɛkpɔɔ
wre haa chaa pre,
we u ŋga mɛɛ,
a pe yiɛ we shɔ nyjila kro nu.
27 Leele mblɛ pee wa tra ŋga nu kro,
we o Tafun Nyiɛkpɔɔ wre sɔɔnri,
a leele nyininyini kro,
we paan u sumi.
28 Ŋgi na hin?
O Tafun Nyiɛkpɔɔ wre wi ŋunu,
a wra waŋgra ŋga kro le.
29 Mblɛ pe peyɛ kpɔɔri,
mu peyɛ ta kro
we kosie kan u yiɛ.
Hali mblɛ pe ku na shie wee kro,
pie paan kosie kan u yiɛ.
30 Biile mblɛ pie kɔɔ yiri mbakɔ,
kro we u sumi,
a pie kna mbe o Tafun Nyiɛkpɔɔ
wre kee yo,
pe kro wolo pan.
31 Leele mblɛ pe n ta mu se tun kre,
pie Nyiɛkpɔɔ frakaa kre kee
yo pe pan,
na wre wra u leele ŋmaashɔ.