David mɛɛ ŋga wra kɔ.
21
O Tafun Nyiɛkpɔɔ,o ŋunu yiɛshɔ ŋga
mu u ŋga na,
a mu ŋmaashɔmu ndra na,
wejiŋge saan u na.
2 Ŋga u loloŋgo chaa mu u ŋga,
a ŋga u nyu nyaa mu wie kre,
mu tia u ki ta.
3 Mu u ŋga dwamu chichie,
mu u le swanyiɛ juulee.
4 Wra mu tali ŋmatitnɔmu,
a mna u ŋga blenyini ŋmaa.
5 Mu yaa ŋga mu ya u na,
kre ndra na, u yɛnyiŋge kpɔɔ.
Mu u ŋga kpɔɔmu na buuro.
6 Mu u ŋga dwamu,
ŋga kii wa blenyini,
a yɛshɔɔrɔ ŋga kii wa mu jaara,
kre tia u yiɛshɔ.
7 Ŋgi na hin?
Ŋunu yiɛ wa o Tafun Nyiɛkpɔɔ
Jaŋgafun wre na.
A ŋga Nyiɛkpɔɔ koroo kpɔɔ kre na,
ŋunu wa seeri.
8 A ŋunu kɛ we to
u loŋgoolo kro na,
mblɛ pe u pra kre,
we pe yii na kɛ ni peii.
9 A na o Tafun wre waa pan kre,
we kanhun tɛɛ mbe pe kla.
O Tafun Nyiɛkpɔɔ wre,
we u krɔkuɔn kre tɛɛ
mbe pe sro,
mbe pe dɔɔya peii.
10 Ŋunu we pe biile kla
mbe yili tra ŋga na,
a wa pe luuro ti leweele nu.
11 Na pe jina to,
mbe mu pe sisaa kuraa kre,
pia jaa ki pe,
12 a na mu mu bɛŋɛ kan pe na,
pie fɛ mbe ndru pe kro.
13 O Tafun Nyiɛkpɔɔ,
mu faŋga kre na oo mu kpɔɔ,
a mu jaŋga kre ndra na,
oo mɛɛ kɔ mbe mu jaŋga yile.