David mɛɛ ŋga wra kɔ.
19
Yirɛ nyjɛ o nyaa nyiɛ yiɛ na,yire tia o Nyiɛkpɔɔ yɛnyiŋge nya,
a yi tia o u kawako yirɛ,
nyjɛ u pe nya.
2 Lafo na blee,
Nyiɛkpɔɔ kee nyjɛ we pe nyina.
3 Yi n na paara,
mbe ndro loo,
4 a nde kee nyjɛ yi yuu kro kpali,
a pe yi loo lawee kro nu.
Nyiɛ yiɛ na wa u lawee,
gbeele yila pan.
5 Na ki yilii, mu yo,
bijɔplɔ yilii fimi na.
Ki yilii na tafɛŋgɛfun,
yɛshɔɔrɔ tɛɛ mbe fɛ.
6 Ki yilii kokoo nunu na,
mbe kila chiin,
mbe sɛ to kokoo nunu na.
A yaka n wa mbe jaa ndra,
mbe ki wrɛŋgɛ wa ki sro.
7 Nyiɛkpɔɔ mbra pe kpra,
na lewo kaan faŋga fɔŋgɔ.
Nyiɛkpɔɔ nyu kee pe yɛŋgɛ,
mu na mblɛ pe n jawala ni,
pini kachimblɛ.
8 O Tafun Nyiɛkpɔɔ kee,
nyjɛ u yuu kro pe kpra,
yi tii mbe lewo yɛshɔɔrɔ ta.
Nyiɛkpɔɔ mbra,
nyjɛ u leni yire pe cheche,
a mblɛ pe lii yi na,
pre yɛshɔɔrɔ taa.
9 Nyiɛkpɔɔ mbra nyu,
Ŋgi na hin? Yii wa nyjila kro nu.
Nyiɛkpɔɔ kprakuɔn pe kpra,
mu fraka mu ya.
10 Nyiɛkpɔɔ mbra kee niŋge ni,
mu wɛ swa nyiɛ,
ŋga pe le kanhun mu ki wɔ na,
mu tna mu wɛ srɛ ŋmba pe nu na.
11 Mbra yire ni u u sumifɛɛnlɛ jaari,
a mblɛ pe lii yi na kre,
fɔtɔɔrɔ chiriri wa na pe sri.
12 Ndro ŋmbi we jaa wre titi punɔɔ,
nyjɛ u punu nya hin?
Kena Nyiɛkpɔɔ, ni sisam,
nyjɛ yi ndra yire ti mu ni kɛ.
13 Ni wɔ mu yili sisam,
nyjɛ ni tuwi mu pe yire nu,
a maa ti yi jaŋga ta ni na,
mbe ni niyɛ ta,
mbe shɔ hakɛ kɛɛ.
14 Ti mbe ni nyu kee tna mu pan,
mbe ni loloŋgo kee mu yiɛ nyi.
O Tafun Nyiɛkpɔɔ,
ŋu wi ni lefun, na ni shɔfun.