Mɛɛ ŋga David na kɔ nyjila ŋga ni Nyiɛkpɔɔ na u shɔ u loŋgoolo kro kɛɛ, mna u shɔ Saul kɛɛ.
18
O Tafun Nyiɛkpɔɔ, ni mu kori.Ŋgi na hin? Ŋu wi ni faŋga.
2 A ŋu wi ni lefun,
na ni fɛnkaarifun,
na ni ŋmaashɔfun.
Ŋu jaara mbe fɛ mbe sɛ,
mbe mu ni shɔ,
Ŋu mu kɛ toni ni na,
na ni kaan faŋga.
3 Ndaa nyɛni
mu o Tafun Nyiɛkpɔɔ wre yeeri,
a wra ni shɔ ni loŋgoolo kɛɛ,
kena mbe u ŋga mboo.
4 Loŋgoolo na pɛɛlɛɛ pɛɛri na ni sri,
ki tia ndaa chaa ku.
5 Ndaa kumu nya kuraa mu kɔ,
hali a faŋga na nyu nyaa na ni sri.
6 Ni kanyana nu, ni nyɛni,
mu o Tafun Nyiɛkpɔɔ yeeri.
Ni mana kpɔɔ tɛɛ mu u yeeri,
a u yire u Suminyuŋgo wa
mu ni mana loo.
Ni nyɛnɛɛ ŋga ni yire u yiɛ
mu nyɛni kre, ki le u ndie.
7 Krɔ na o Tafun Nyiɛkpɔɔ kun,
a kra tia tra na nyuɛ kro na seeri.
8 Wree naa yilii u maalɛɛ,
a kanhun naa yilii u nyu lam,
na yirɛ yi shio.
9 Wra yire u nyjeeri wa mna tii tra,
a tloe na u fɛ mu kun.
10 Cherubim kuɛn na wra tni,
mna nyaari fuflɛ na mu pan.
11 Wra tia wɔmu na u tɔ,
a tlo na u tɔ poŋgo.
12 Lawee naa chiɛnri u yiɛ,
a nyiɛsubie na kanhun
muŋgo naa woni,
a tloe naa feni u yiɛ.
13 O Tafun Nyiɛkpɔɔ wre na yire
nyjeeri wa mna twanri,
a pra wre ŋmba uu wa nyjeeri wa,
wre mana loo,
a nyiɛsubie na kanhun muŋgo
na yiri nyjeeri na woni.
14 U u snimi wa,
a u loŋgoolo fɛ mu nyina,
a u tia nyiɛ nyi,
a pra feni poŋgo.
15 O Tafun Nyiɛkpɔɔ, ŋga mu fuu
mu loŋgoolo na krɔ ni,
a fuflɛ yili mu maalɛɛ kre lɔɛ yua,
a tra yiɛ na nyaa.
16 O Tafun Nyiɛkpɔɔ
wre na yire nyjeeri wa,
mna tii tra mu pan mu ni tini,
mu wɔ lɔɔ jijuom nu.
17 Ni loŋgoolo
pre faŋga na wɛ ni na,
a nde wra ni shɔ pe kɛɛ.
18 Ni kanyana nyjila nu,
pra pan mu ni tɔ,
la, Nyiɛkpɔɔ na kɛ tɔ ni na.
19 U ni shɔ mu sɛ ni tɛɛ
lawee chichie nu.
Ŋgi na hin? U ni kee chaa.
20 Nyiɛkpɔɔ ni frakaa le,
mu ni fɔlɔ tɔ,
u le na nɛɛrɛ n wa ni na,
ki tia u ni ŋga,
ŋga ki fna na ni ni.
21 Ni o Tafun Nyiɛkpɔɔ
wre kolo wru,
a ni n laa u kro.
22 Ni li u mbra yire kro na,
ni n ndikana kee pe
u mbra yire na.
23 Nɛɛrɛ ka n wa ni na,
a ni niyɛ wɔ sisam pee nu.
24 Ni fraka, a ni kɛnyi n le
nɛɛrɛ ka nu.
Ki tia o Tafun Nyiɛkpɔɔ
wre ni ŋga fɔtɔɔrɔ ŋga ki fna.
25 O Tafun Nyiɛkpɔɔ,
mblɛ pe fraka mu yiɛ kre,
mu fraka pe pan,
mblɛ pe nyu kre,
kpra na mu ti
mbe pe chin na mu nyu.
26 Mblɛ pe pe cheche kre,
mu pe cheche mbe pe ŋga,
la, mblɛ pe n fraka kre,
mu krɔ kna mu wa pe na.
27 Mblɛ pe peyɛ nyjii kre,
mu pe shio,
la, mblɛ pe peyɛ kpɔɔri kre,
mu pe pe fiɛn.
28 O Tafun Nyiɛkpɔɔ mu tia
ni nyisee nya,
a ndram wɔɔ n wa na.
29 Mu ni ŋga faŋga,
mbe ni jaa ni loŋgoolo tɔ,
a mu ni ŋga jaŋga,
mbe ni jaa ye pe bubunyi na.
30 Nyiɛkpɔɔ kolo kro nyu,
u kee ŋga u yuu kpan pe kpra,
a mblɛ pe feni na shie u pan kre,
u kɛ toni pe na.
31 O Tafun Nyiɛkpɔɔ wre chiin
wi ni Nyiɛkpɔɔ,
a wre chiin wi o lefun.
32 Nyiɛkpɔɔ wre chiin
u ni kaan faŋga,
a u ni kolo kro pe chasi.
33 U tia ni yire chichie,
u ni jeelee pe na kafaa jeelee yi,
mu tia ni ndrahaa ta nyuɛ na.
34 U ni nyina
imi pe kɛnyi teeri na wii,
ki tia mbe jaa tɔɔnrɔ bɛŋɛ kru.
35 O Tafun Nyiɛkpɔɔ,
ŋu mu kɛ tɔ ni na,
mu ni ŋga ŋmaa.
Ŋu mu ni yii, mu ni kpɔɔ,
a mu jaŋga kre ni shɔ.
36 Ŋu mu ni kolo vala,
a mba gbro.
37 Ni ni loŋgoolo kɔŋgɔ ni,
mu sɛ pe yii,
ni nsra laa pe kro,
mna sɛ su na ndaa pe kla.
38 Ni pe gbun mu chan,
a pia jaa yiri na.
39 Mu ni ŋga faŋga mbe ni wi,
a mu tia ni loŋgoolo to ni yiɛ.
40 Mu tia ni loŋgoolo krɔ kna,
mu wa ni na,
a ki tia ni pe kla peii.
41 Pra nyɛni na shɔfun chaa,
la, pe nsra wa ta.
Pra nyɛni,
mu o Tafun Nyiɛkpɔɔ wre yeeri,
la, u nsra shɔ pe pan.
42 Ndaa pe pe,
na bloŋgoo wa fuflɛ yiɛ,
ndaa tia pra pe na lete tra yi.
43 Ŋu mu ni shɔ,
mblɛ pe wii na ni ni pre kɛɛ,
mu tia ni pe waŋgra fɔŋgɔ ndra.
Leele mblɛ ni n chin kuraa kre,
pre pe ni sumi.
44 Na pe ni gbra kun,
mbe pra fulo ni yiɛ.
45 Ni fiɛrɛ tia na pe pan
mu yire ni yiɛ,
mbe pra seeri.
46 O Tafun Nyiɛkpɔɔ wree wa,
nyjila kro nu,
ni lefun wre, mbe u ŋga mɛɛ.
Ni ŋmaashɔfun Nyiɛkpɔɔ wre,
mbe u kpɔɔ.
47 Nyiɛkpɔɔ wre
u mblɛ pe ni pini sisaa
pre fɔlɔ toni.
A wre u leele le ni jaara.
48 Wre u ni shɔ ni loŋgoolo kɛɛ,
mu ni yire a ni wɛ
mblɛ pe ni chaa mbe kla pre na,
a u ni shɔ
mblɛ pe jaŋga lii pre kɛɛ.
49 Kena o Tafun Nyiɛkpɔɔ,
mbe mu mɛɛ yile waŋgra leele,
mblɛ pe n mu chin pre nu.
Mbe mɛɛ kɔ mbe mu kpɔɔ.
50 Nyiɛkpɔɔ ŋu mu mi David wɔ,
mu ni pe ŋunu,
mu tia ni wi mu yili,
mu tia mi na ni nanae,
mu koroo kpɔɔ kre nya.