David nyiɛtalaa mɛɛ.
17
O Tafun Nyiɛkpɔɔ,ni kefrakaa ŋga loo ni pan,
ndie tɛɛ mu ni talaa,
na ni nyɛnɛɛ loo.
2 Jande ni kala li mu ni ŋga.
Ŋgi na hin?
Ŋu mu ŋga ki fraka chin.
3 Mu pan ni jaara blee,
mu ni lɛɛ lam nya.
Mu ni lam kro le mu nya na,
kee fɔɔn ka n wa ni nu,
a ni yo na mba ti
mbe sisam kee ka yili ni nyuu.
4 Na ni wre leweele kepele le kre,
mu nyu kee tia ni laa
sisampefɛɛnlɛ pre kro.
5 Nyjila kro nu, mu kolo na ni troi,
ni n da mu mu kolo wa tun.
6 Nyiɛkpɔɔ, ni nyɛni na mu yeeri.
Ŋgi na hin?
Ni chin na mu ndru ni pan,
kena jande
ndie tɛɛ ni nyiɛtalaa na.
7 Mu mu kawako koroo kre nyina.
Ŋu mu mu jaŋga kre teeri
na o shio,
a mblɛ pe feni na paan mu jaara pre,
mu pe shio pe loŋgoolo kɛɛ.
8 Kɛ tɔ ni na imi na mu kɛ toni
ŋu titi nyibie na kre,
mu ni ndra imi na ŋgolo
u biile ndra u kuɛn jaara kre.
9 Ni shɔ sisampefɛɛnlɛ mblɛ
pe ni chaa mbe gbo ŋga kɛɛ.
10 Pe n foorochiɛn ni,
nyukpɔɔmu kee bribri pe yuu.
11 Pe fɛ mu ni kun,
mna mbe tro kpan,
kolo pe chaa mbe ni tinii wa tra.
12 Pan pe nyi na klo jira ta
wra sro chaa,
pe ja mu na ni sri,
na jira yirifuŋu ja, mu na yurɛ sri.
13 O Tafun Nyiɛkpɔɔ yiri,
mu pe nyu kaanri,
mu pe nyu gbo.
Mu mu brɔfiɛn yiɛ shiin kre tɛɛ,
mu ni shɔ sisampefɛɛnlɛ pre kɛɛ.
14 Nyiɛkpɔɔ jande,
mu jaŋga kre tɛɛ mu ni shɔ,
mu yili pre leele mblɛ nyini kɛɛ.
Pre leele mblɛ, pe fɔtɔɔrɔ kro,
waŋgra ŋga nu ki nyi.
Kanyana ŋga mu tɛɛ na pe sri kre,
tɛɛ mu pe ndie tini,
mbe pe ndie tiniɛ kre ka da pe biile,
na pe nanae kro na.
15 Mi rɛ, mbe mu yiɛ nya.
Ŋgi na? Ni fraka,
a na ni mu nya na nyibie ni kre,
mbe yɛshɔɔrɔ li.