Kprakuɔn Nyiɛtalaa
10
O Tafun Nyiɛkpɔɔ,mni a mu yire haa lee hin?
Mni a o kanyana nyjila nu,
a mu muyɛ ndra o na hin?
2 Sisampefɛɛnlɛ peyɛ kpɔɔri,
mu tia wejiŋge wɛɛri
foorofɛɛnlɛ na.
Pe kolo cha mu na pe yiri.
3 Sisampefɛɛnlɛ pre,
sisam kee nyjɛ yii wa,
pe gbun na titi yire,
yire ni pe peyɛ kpɔɔri.
Pre jajaarafɛɛnlɛ pre,
jiɛnlɛ kee pe yuu,
na o Tafun wre krɔ kuun,
4 Pe kee ka ma na o Tafun wre ni,
peyɛ kpɔɔrɔm kre tia,
pe jawa na Nyiɛkpɔɔ n wa.
5 Nyjila kro nu,
pe pe loŋgoolo pini na tɛɛ.
6 Sisampefɛɛnlɛ yuu na,
“Yaka wa jaa o jɔŋgɔ o titɛɛ,
Oo ti mbe o yiɛ shɔ,
ŋgi na hin? Yaka wa o ta.”
7 Suŋgɔ, na kafinɛ, na dnumu kee
bribri yi yilii pe nyuu.
A nyjila kro nu kre,
katala na sisam kee
yii wa pe nyuu.
8 Nyjila kro nu pee wa
mu ja nyaa mbe ndra,
mbra ŋmba u n yaka pe
wre siri mbe u yii,
mbe gbo finfin.
9 Pie sɛ ja na jira wi,
mbe sɛ su,
na pie ŋmba wa jaa yaka pe
kuraa wre yii.
Na pe waa u yii na pɛlɛ ni,
mbe pe u tini mbe sɛ.
10 Na pe pe brɛbrɛ,
a pe kɛ to u na kre,
mbe pe u kla.
11 Na pe kɔ,
mbe pe knaa yo peyɛ pan na,
“Nyiɛkpɔɔ kee ka ma,
u nyiɛlɛ tɔ, a ki tia wa o nya.”
12 O Tafun Nyiɛkpɔɔ yiri ɛ,
Nyiɛkpɔɔ sisampefɛɛnlɛ pre yii,
jande maa shia foorofun wre fɛɛ.
13 Mni a sisampefɛɛnlɛ
na Nyiɛkpɔɔ le fiɛn
na yuu peyɛ pan, mbo,
“Nyiɛkpɔɔ wa o pe yaka ŋga hin?”
14 La, ŋu Nyiɛkpɔɔ mu nyaa,
ŋu mu katalafɛɛnlɛ,
na kanyanafɛɛnlɛ le na pe shio.
Ŋu kɛɛ mblɛ pe fnai
kre peyɛ wru mu le,
a ŋu wi bijile lefun.
15 Nyiɛkpɔɔ sisampefun jaŋga
gbo u nu,
u ndie tini mu sɛ su na,
wa ka pe na.
16 O Tafun Nyiɛkpɔɔ,
ŋunu wi nyjila kro nu,
waŋgra leele mblɛ pe n u chin kre,
we fun u tra na.
17 O Tafun Nyiɛkpɔɔ,
mblɛ pe kala nyaa pre,
mu pe kee ndru,
na pe leni gbeŋmbaa,
na pe nyɛnɛɛ ndru.
18 A bijile na mblɛ pe fnai pre,
mu pe kee yo mbe pe ŋga,
mbe sɛ su na lewo na nyjuro
ŋmba u yili tra nu kre,
waa jaa u ŋmbrɔ piɛri na.