Mɛɛ ŋga David na kɔ u biblɔ kum kɔkro.
9
O Tafun Nyiɛkpɔɔ mbe lɛɛ wɔ,mbe mu ŋga mboo.
Kawako kee nyjɛ mu pe yire kro,
mbe yi kee yo.
2 Mu ndra na,
mbe ti mbe ni yiɛ shɔ kpɔɔ.
Jaŋgafun Nyiɛkpɔɔ,
mbe mɛɛ kɔ mbe mu mɛɛ yile.
3 Ŋga ni loŋgoolo mu nya kre,
pe ndru kro ni mu sɛ to mu ku.
4 Ŋgi na hin?
Mu tni mu ŋujɔɔn na,
mu kala li,
mu kpra ŋga ki fraka kun.
Mu ni kala li kpra ni.
5 Leele mblɛ pe n mu chin kre,
mu pe yiɛ kee yo pe pan,
pre sisampefɛɛnlɛ pre mu pe kla,
a ndro wa pe sɔɔnri na.
6 Mu ni loŋgoolo pre kla,
mu pe chiɛ kla kro,
yaka n wa mbe o nya,
mbe tɛɛ mbe pe sɔɔnri na.
7 O Tafun Nyiɛkpɔɔ wre,
ŋunu wi nyjila kro nu,
a uu wa u ŋujɔɔn na,
na kpra kuun.
8 We leele le kpra ni,
mbe pe kala li kpra ni.
9 O Tafun Nyiɛkpɔɔ wi
mblɛ pe fiŋge,
pra kala nyaa pre fɛnkaarifun.
10 O Tafun Nyiɛkpɔɔ,
mblɛ pe mu chin pre,
pie dankna mu na.
Ŋgi na hin?
Mblɛ pe mu haa chaa pre,
ma pe wa.
11 E mɛɛ kɔ e o Tafun Nyiɛkpɔɔ,
ŋmba uu wa mu tni
Zion nyua na Wre ŋga mɛɛ.
E u kee nyjɛ u pe yire
kee yo leele nu.
12 Mblɛ pe kala nyaa kre,
Nyiɛkpɔɔ pe sɔɔnri,
wa pe nyɛnɛɛ fɛɛ.
A mblɛ pe tia pra kala nyaa kre,
u pe ndie tinii.
13 O Tafun Nyiɛkpɔɔ, ni fooro le.
Le imi na ni loŋgoolo,
tia ndaa kala nyaa mu da.
Ni shɔ mu yili kumu kɛɛ,
14 mbe ni yire Jerusalem leele yiɛ na,
mbe mu kee nyjɛ na ni mu kaan mɛɛ
yire kro yo.
Mbe ti ni yiɛshɔ. Ŋgi na hin?
Mu ni shɔ.
15 Leele mblɛ pe n Nyiɛkpɔɔ chin pre,
pe ndru mu kna mu to
pre titi weele nyjɛ pe tuulo nu.
Pre titi pɛɛlɛɛ, nyjɛ pe pɛɛri
mu ndra yire,
yi kna mu pe yii.
16 O Tafun Nyiɛkpɔɔ wre yire
u kpra na,
mu uyɛ wɔ mu nyina,
a sisampefɛɛnlɛ pe kee
nyjɛ pe pini yire tɛɛ,
mu peyɛ pɛɛri pɛɛlɛɛ.
17 Sisampefɛɛnlɛ,
mblɛ pe Nyiɛkpɔɔ je kre,
pe taa haa yi kuulo ndoo.
18 A mblɛ pe shian kre,
wa pe fɛɛ fio.
A foorofɛɛnlɛ dankna
ŋga pe ta u nu kre wa kɔ.
19 O Tafun Nyiɛkpɔɔ yiri,
maa ti mbe lewo na nyjuro tam li.
Waŋgra leele kro kala li mu yiɛ.
20 O Tafun Nyiɛkpɔɔ,
ti mbe fiɛrɛ pe yii.
Ti mbe waŋgra leele pre chin,
na pe n pe yaka mu yiɛ.
Ti mbe pe chin na leweele lɛ.