Mɛɛ ŋga David na kɔ mu wru Cush na Benjamin ndro haa.
7
O Tafun Nyiɛkpɔɔ,ŋu jaara ni fɛ mu pan,
ni shɔ ni loŋgoolo
mblɛ pe ni chaa kro kɛɛ,
2 na kre ma pie ni wla bɛɛlɛbɛɛlɛ
imi na jira yurɔ pini kre.
Shɔfun n wa ni pan na ŋu bɔkɔ.
3 O Tafun, ni Nyiɛkpɔɔ,
na ni kee ŋga ki n fna pe,
ndee na sisam kaa wa ni kɛɛ,
4 a ni ni tnifun ŋmba mi na wre tni,
wejinyiŋge nu pe sisaa ka,
ndee na ni ŋmba u ni pra li
dnumu ka kre,
5 kena ti mbe ni loŋgoolo ni taa yii,
mbe ni gbun mbe wa tra gboo na.
6 O Tafun, krɔ tɛɛ mu yiri,
mu ni loŋgoolo taan,
ni Nyiɛkpɔɔ yiri mu ya ni na.
7 Ti mbe leele kro paan ble mu yiɛ,
mbe mu yire nyjeeri,
mbra mu ŋunumu lii pe na.
8 O Tafun Nyiɛkpɔɔ
ŋu mu leele kala lii,
jande ni kala li mu ni ŋga,
mu chin na ni n pimi li.
9 Nyiɛkpɔɔ mu fraka,
ŋu mu lewo jawala,
na u lɛɛ kee kro chin,
ti mbe sisampefɛɛnlɛ sisam nyu to,
mu nyu mblɛ pe fraka kre na.
10 Ni ndraa wa Nyiɛkpɔɔ kɛɛ,
a mblɛ pe fraka pre, u pe shio.
11 Nyiɛkpɔɔ fraka u kprakuɔn nu,
a blenyini ŋga,
u sisampefɛɛnlɛ gbuun na pimi ni.
12 Na lewo n u jawala chinɛ kre,
Nyiɛkpɔɔ we u brɔfiɛn yiɛshiin
kre liɔ,
mbe snimi yii mbra u sri.
13 U u yirɛ nyjɛ ni u leele kuu,
kro nyu gbeele,
a u snimi nyu na nyini kanhun.
14 E le sisam nyjɛ sisampefun pini,
katala kee na kafinɛ kee u yuu,
nyjila kro nu.
15 Sisampefun wee tuu
mu ki lam wɔ,
mu ndru mu kna mu to ki nu.
16 Kefuɛn nyjɛ u pini leele na kre,
kna mu tuu u na.
17 Mbe o Tafun Jaŋgafun wre
ŋga mboo,
u frakaa kre ndra na,
a mbe mɛɛ kɔ mbe u mɛɛ yile.